കണ്ണൂര് കൈതപ്രത്ത് ഗുഡ്സ് ഓട്ടോ ഡ്രൈവർ രാധാകൃഷ്ണനെ വെടിവെച്ചു കൊലപ്പെടുത്തിയ കേസില് രാധാകൃഷ്ണന്റെ ഭാര്യ മിനി നമ്പ്യാർ അറസ്റ്റിൽ. ഗൂഢാലോചന കുറ്റം ചുമത്തിയാണ് അറസ്റ്റ്. കേസിൽ മൂന്നാം പ്രതിയാണ് മിനി നമ്പ്യാർ. പ്രതിയെ റിമാൻഡ് ചെയ്തു. രാധാകൃഷ്ണനെ കൊലപ്പെടുത്തിയ സന്തോഷും രാധാകൃഷ്ണന്റെ ഭാര്യയും സഹപാഠികളായിരുന്നു.
മിനി നമ്പ്യാരുമായി സൗഹൃദം തുടരാൻ സാധിക്കാത്ത വിരോധത്തിലാണ് പ്രതി സന്തോഷ് കൊലപാതകം നടത്തിയതെന്നായിരുന്നു എഫ്ഐആർ. രാധാകൃഷ്ണൻ്റെ മരണത്തിന് പിന്നാലെ ഭാര്യയെ കൂടി പ്രതി ചേർക്കണമെന്ന ആവശ്യം ശക്തമായിരുന്നു. കൊലപാതകത്തിന് ഉപയോഗിച്ച തോക്ക് രാധാകൃഷണൻ്റെ ഭാര്യാമാതാവിൻ്റെ വീടിന് സമീപത്തു നിന്ന് ലഭിച്ചതും ഭാര്യയുടെ സമൂഹമാധ്യമ പോസ്റ്റുകളുമാണ് സംശയത്തിന് ഇടയാക്കിയത്.
