തിരുവനന്തപുരം: കേരളത്തിന് തീരദേശ സുരക്ഷയ്ക്ക് പ്രത്യേക മറൈൻ റിസർവ് ബറ്റാലിയൻ അനുവദിക്കുന്നതിന് കേന്ദ്രം ആലോചിച്ചതായി മുഖ്യമന്ത്രി പിണറായി വിജയൻ അറിയിച്ചു. നിരോധിത വസ്തുക്കൾ കടത്തൽ തടയൽ, തീരദേശ സുരക്ഷ എന്നിവയിൽ വിദഗ്ധതയുള്ള ഈ പ്രത്യേക യൂണിറ്റിനുള്ള അംഗങ്ങൾക്ക് പരിശീലനം, ആയുധം, പ്രവർത്തന സജ്ജമാക്കൽ എന്നിവയ്ക്കുള്ള ചെലവിന്റെ പ്രധാന ഭാഗം കേന്ദ്രം വഹിക്കും. ആവശ്യപ്പെട്ടാൽ ഈ ബറ്റാലിയന്റെ സേവനം കേന്ദ്രമോ മറ്റ് സംസ്ഥാനങ്ങളോ ഉപയോഗിക്കാമെന്ന് അധികൃതർ ഉറപ്പു നൽകിയതായി അദ്ദേഹം പറഞ്ഞു.
കേന്ദ്ര ആഭ്യന്തര മന്ത്രി അമിത് ഷായുമായി നടത്തിയ കൂടിക്കാഴ്ചയിൽ, കേരളത്തിന്റെ 640 കിലോമീറ്റർ നീളമുള്ള തീരപ്രദേശത്തെ സുരക്ഷാ പരിഗണനകളും പ്രധാനമായും ചർച്ചയായിരുന്നു. കൂടാതെ സെൻറർ ഫോർ ഫോറൻസിക് സയൻസ് റിസർച്ച് ആൻഡ് എജ്യുക്കേഷന്റെ റീജ്യണൽ കാമ്പസ് കേരളത്തിന് അനുവദിക്കാനുള്ള സാധ്യത പരിഗണിക്കാമെന്ന് അമിത് ഷാ ഉറപ്പ് നൽകിയതായി മുഖ്യമന്ത്രി അറിയിച്ചു.
സൈബർ ഫോറൻസിക്, സൈബർ കുറ്റകൃത്യ പ്രതിരോധ അടിസ്ഥാന സൗകര്യങ്ങൾ മെച്ചപ്പെടുത്തുന്നതിനായി 108 കോടി രൂപ കേന്ദ്രം നൽകുമെന്നും, സൈബർ തട്ടിപ്പ്, കുട്ടികൾക്കും സ്ത്രീകൾക്കും നേരെയുള്ള സൈബർ ആക്രമണങ്ങൾ എന്നിവയുമായി ബന്ധപ്പെട്ട ആശങ്കകളും യോഗത്തിൽ ചർച്ച ചെയ്തതായി അദ്ദേഹം കൂട്ടിച്ചേർത്തു.
