കൊച്ചി: വരാനിരിക്കുന്ന ഇന്ത്യൻ സൂപ്പർ ലീഗിൽ കേരള ബ്ലാസ്റ്റേഴ്സ് പങ്കെടുക്കുമെന്ന് ക്ലബ്. കഴിഞ്ഞ സെപ്റ്റംബറില് തുടങ്ങേണ്ടിയിരുന്ന ഇന്ത്യന് സൂപ്പര് ലീഗ് മത്സരങ്ങൾ ഫെബ്രുവരി പതിനാലിന് ആരംഭിക്കാനാണ് നിലവിൽ തീരുമാനിച്ചിരിക്കുന്നത്. ഓൾ ഇന്ത്യ ഫുട്ബോൾ ഫെഡറേഷനുമായും മറ്റ് അധികൃതരുമായും നടത്തിയ ചർച്ചകൾക്ക് ശേഷമാണ് ക്ലബ്ബ് പങ്കാളിത്തം ഉറപ്പാക്കിയത്. ബ്ലാസ്റ്റേഴ്സ് ഉള്പ്പെടെ പതിനാല് ടീമുകളും ലീഗില് കളിക്കാന് സമ്മതം അറിയിച്ചിട്ടുണ്ട്. സീസണില് ഒരു ടീമിന് 13 മത്സരമാണുണ്ടാവുക.
ഈ വിഷയത്തിൽ കൃത്യസമയത്ത് ഇടപെടുകയും ചർച്ചകൾക്ക് മധ്യസ്ഥത വഹിക്കുകയും ചെയ്ത കേന്ദ്ര കായിക മന്ത്രാലയത്തിന് ക്ലബ്ബ് നന്ദി അറിയിച്ചു . ചില പ്രധാന വിഷയങ്ങളിൽ കൂടുതൽ വ്യക്തത ലഭിക്കാനുണ്ട്. ഇതുമായി ബന്ധപ്പെട്ട കാര്യങ്ങൾ ക്ലബ്ബ് സജീവമായി പരിശോധിച്ചുവരികയാണെന്നും വിഷയങ്ങളിൽ കൂടുതൽ വ്യക്തത ലഭിക്കുന്ന മുറയ്ക്ക് വരും ദിവസങ്ങളിൽ കൂടുതൽ വിവരങ്ങൾ ഔദ്യോഗികമായി അറിയിക്കുമെന്നും ക്ലബ് വ്യക്തമാക്കി . നൽകുന്ന പിന്തുണയ്ക്കും കാണിക്കുന്ന ക്ഷമയ്ക്കും ആരാധകരോടും മറ്റ് പങ്കാളികളോടും കേരള ബ്ലാസ്റ്റേഴ്സ് നന്ദി രേഖപ്പെടുത്തി .
.
