മലപ്പുറം: കീഴുപറമ്പ് ഭിന്നശേഷിക്കാർക്കുവേണ്ടി ദമ്മാം കെ.എം.സി.സി. നടപ്പിലാക്കുന്ന “മെഴ്സി മിഷൻ” പദ്ധതിയുടെ ഭാഗമായി പുണ്യകർമ്മത്തിനായി യാത്ര പുറപ്പെടുന്ന മായിൻ കുട്ടിക്ക് കിഴുപറമ്പ് ടൗൺ മുസ്ലിം ലീഗ് കമ്മിറ്റി യാത്രയയപ്പ് നൽകി. കെ.എം.സി.സി.യുടെ ജീവകാരുണ്യ പ്രവർത്തനങ്ങളെ ചടങ്ങിൽ പങ്കെടുത്ത വിവിധ രാഷ്ട്രീയ നേതാക്കൾ പ്രശംസിച്ചു. ടൗൺ മുസ്ലിം ലീഗ് പ്രസിഡൻ്റ് വൈ.പി. നിസാറിൻ്റെ അധ്യക്ഷതയിൽ ചേർന്ന യാത്രയയപ്പ് സമ്മേളനം കിഴുപറമ്പ് ഗ്ലോബൽ കെ.എം.സി.സി. പ്രസിഡൻ്റ് അസ്ലം കോളക്കോടൻ ഉദ്ഘാടനം ചെയ്തു.
ആംഗ്യഭാഷാ പരിഭാഷ ശ്രദ്ധേയമായി കെ.എം.സി.സി.യുടെ മനുഷ്യസ്നേഹപരമായ പ്രവർത്തനങ്ങൾക്ക് അഭിനന്ദനം അറിയിച്ചുകൊണ്ട് സി.പി. ഇബ്രാഹിം, എം.സി. ഹാരിസ് മാസ്റ്റർ, വെൽഫെയർ പാർട്ടി നേതാവ് റഷീദ് കെ.കെ., കോൺഗ്രസ് നേതാവ് അബ്ദുറഹ്മാൻ എം.കെ., യൂനുസ് സി.എച്ച്. എന്നിവർ സംസാരിച്ചു. ചടങ്ങിലെ ഏറ്റവും ശ്രദ്ധേയമായ കാര്യം, എം.ടി. നാസർ പ്രസംഗങ്ങളെല്ലാം ബധിരരായ ശ്രോതാക്കൾക്കായി തത്സമയം ആംഗ്യഭാഷയിലേക്ക് പരിഭാഷപ്പെടുത്തി നൽകി എന്നതാണ്.
ചടങ്ങിൽ വെച്ച് അഹമ്മദ് കുട്ടി കോളക്കോട്, മായിൻ കുട്ടിക്ക് ഉംറ യാത്രയ്ക്കുള്ള വിസയുടെ പകർപ്പ് കൈമാറി. കെ.കെ. ബഷീർ, സി.ടി. ഷബീർ, കുഞ്ഞിപ്പ എന്നിവർ പരിപാടികൾക്ക് നേതൃത്വം നൽകി.ടൗൺ മുസ്ലിം ലീഗ് ജനറൽ സെക്രട്ടറി ഡോ. അബ്ദുൽ ഗഫൂർ സ്വാഗതവും, ട്രഷറർ സലീം മാസ്റ്റർ നന്ദിയും രേഖപ്പെടുത്തി.
