തിരുവനന്തപുരം: കോവളം സ്പാ പീഡനക്കേസിൽ കൂടുതൽ നിർണായക വിവരങ്ങൾ പുറത്ത്. പ്രായപൂർത്തിയാകാത്ത പെൺകുട്ടിയാണ് ഇരയെന്ന കാര്യം സ്പാ ഉടമയായ പ്രധാന പ്രതിക്ക് അറിയാമായിരുന്നുവെന്നാണ് അന്വേഷണത്തിൽ കണ്ടെത്തിയത്. കേസിൽ ഹെൽത്ത് ഇൻസ്‌പെക്ടറായ അനുരൂപിനെ പെൺകുട്ടി തിരിച്ചറിയൽ പരേഡിൽ തിരിച്ചറിഞ്ഞു.
സ്പായുടെ നിയന്ത്രണം അനുരൂപിനായിരുന്നുവെന്നും ഉന്നതരെ സ്പായിലെത്തിച്ചിരുന്നത് ഇയാളാണെന്നുമാണ് അന്വേഷണ സംഘത്തിന്റെ കണ്ടെത്തൽ. പെൺകുട്ടിക്ക് വില നിശ്ചയിച്ചതും ഇടനിലക്കാർക്ക് കമ്മിഷൻ തീരുമാനിച്ചതും അനുരൂപാണെന്നാണ് പൊലീസിന്റെ കണ്ടെത്തൽ. ഇയാൾക്ക് നിരവധി സ്പാ കേന്ദ്രങ്ങളുമായി ബന്ധമുണ്ടെന്നും അന്വേഷണത്തിൽ വ്യക്തമായിട്ടുണ്ട്.
ഉന്നത ബന്ധങ്ങളും അനധികൃത സ്വത്തും പരിശോധിക്കുന്നു
കേസിൽ പുറത്തുവന്ന വിവരങ്ങൾ മഞ്ഞുമലയുടെ ഒരറ്റം മാത്രമാണെന്നാണ് പൊലീസ് നൽകുന്ന സൂചന. അനുരൂപിന് വരവിൽ കവിഞ്ഞ സ്വത്തുണ്ടോയെന്നും ഉന്നതരുമായുള്ള ബന്ധങ്ങളുടെ വ്യാപ്തി എത്രത്തോളമാണെന്നും പരിശോധിച്ചുവരികയാണ്.
ഉന്നതരിൽ ചിലർ കോവളത്തെ സ്പായിലെ സ്ഥിരം സന്ദർശകരായിരുന്നുവെന്നാണ് വിവരം. സ്പായുടെ പ്രവർത്തനത്തിന് ഉന്നതരുടെ സഹായം ലഭിച്ചിരുന്നോയെന്ന കാര്യവും അന്വേഷണ സംഘം പരിശോധിക്കുന്നുണ്ട്. സന്ദർശക പട്ടികയിലുള്ള ചിലർ പൊലീസ് നിരീക്ഷണത്തിലാണെന്നാണ് റിപ്പോർട്ട്.
സാമ്പത്തിക ഇടപാടുകളെക്കുറിച്ച് വിജിലൻസ് അന്വേഷണം ആവശ്യപ്പെടാനും പൊലീസ് നീക്കം നടത്തുന്നുണ്ട്. കൂടുതൽ തെളിവുകൾ ശേഖരിക്കുന്നതിന്റെ ഭാഗമായി പ്രത്യേക അന്വേഷണ സംഘം ആന്ധ്രാപ്രദേശിലേക്ക് പോകുമെന്നും വിവരമുണ്ട്. പെൺകുട്ടി സ്പായിലെത്താനുണ്ടായ സാഹചര്യം, ഇടനിലക്കാരുടെ പങ്ക്, മറ്റ് ബന്ധങ്ങൾ എന്നിവ കേന്ദ്രീകരിച്ചായിരിക്കും തുടർ അന്വേഷണം.
സ്പാകൾക്ക് പുതിയ നിയന്ത്രണങ്ങളുമായി കോർപ്പറേഷൻ
കോവളം സ്പായിൽ പ്രായപൂർത്തിയാകാത്ത പെൺകുട്ടി ക്രൂരപീഡനത്തിന് ഇരയായ സംഭവത്തിന്റെ പശ്ചാത്തലത്തിൽ നഗരത്തിലെ സ്പാകളുടെ പ്രവർത്തനം നിയന്ത്രിക്കാൻ തിരുവനന്തപുരം കോർപ്പറേഷൻ നടപടി കടുപ്പിക്കുന്നു. സ്പാകൾക്കായി പുതിയ ബൈലോ തയ്യാറാക്കാനാണ് തീരുമാനം. നിലവിലുള്ള ചട്ടങ്ങൾ കാര്യക്ഷമമല്ലെന്ന വിലയിരുത്തലിനെ തുടർന്നാണ് നടപടി.
സ്പാകളുടെ നടത്തിപ്പിന് വ്യക്തമായ മാനദണ്ഡങ്ങൾ കൊണ്ടുവരും. ക്രോസ് മസാജിങ്, ബോഡി ടു ബോഡി മസാജിങ് തുടങ്ങിയ നിയമവിരുദ്ധ പ്രവർത്തനങ്ങൾ കണ്ടെത്തിയാൽ സ്ഥാപനങ്ങൾ അടച്ചുപൂട്ടുമെന്നാണ് കോർപ്പറേഷന്റെ മുന്നറിയിപ്പ്.
സ്പാകൾക്ക് ഒത്താശ ചെയ്യുന്ന ഉദ്യോഗസ്ഥർ കോർപ്പറേഷനിലുണ്ടെന്ന കണ്ടെത്തലും ഗൗരവത്തോടെയാണ് അധികൃതർ കാണുന്നത്. ഇത്തരം പ്രവർത്തനങ്ങളിൽ ഉദ്യോഗസ്ഥർക്ക് പങ്കുണ്ടെന്ന് തെളിഞ്ഞാൽ അവർക്കെതിരെ കർശന നടപടി സ്വീകരിക്കുമെന്നും മുന്നറിയിപ്പുണ്ട്.
കൂടുതൽ അറസ്റ്റുകൾ ഉണ്ടാകുമെന്ന് ഡിജിപി
പൊലീസിന് വിവരം ലഭിച്ചതു മുതൽ ഹെൽത്ത് ഇൻസ്‌പെക്ടർ അനുരൂപ് നിരീക്ഷണത്തിലായിരുന്നുവെന്നാണ് വിവരം. അന്വേഷണവുമായി ബന്ധപ്പെട്ട് പൊലീസ് കോർപ്പറേഷനുമായി നിരന്തരം ബന്ധപ്പെട്ടിരുന്നുവെന്നും റിപ്പോർട്ടുകളുണ്ട്.
നിയമവിരുദ്ധമായി പ്രവർത്തിക്കുന്ന സ്പാകൾക്കെതിരെ കർശന നടപടി സ്വീകരിക്കുമെന്ന് സംസ്ഥാന പൊലീസ് മേധാവി റവാഡ ചന്ദ്രശേഖർ വ്യക്തമാക്കി. സംഭവത്തിൽ ഏതെങ്കിലും ഉദ്യോഗസ്ഥർ ഇടപെട്ടിട്ടുണ്ടെങ്കിൽ പരിശോധിച്ച് നടപടിയെടുക്കുമെന്നും അദ്ദേഹം പറഞ്ഞു.
കേസിൽ അന്വേഷണം പുരോഗമിക്കുകയാണെന്നും കൂടുതൽ അറസ്റ്റുകൾ ഉണ്ടാകാൻ സാധ്യതയുണ്ടെന്നും ഡിജിപി അറിയിച്ചു. സ്പാകളിലും ബന്ധപ്പെട്ട സ്ഥാപനങ്ങളിലും പരിശോധന തുടരുമെന്നും അദ്ദേഹം വ്യക്തമാക്കി.
കോവളം സ്പാ പീഡനക്കേസ് കൂടുതൽ വിപുലമായ അന്വേഷണത്തിലേക്ക് കടക്കുമ്പോൾ, ഇടനിലക്കാരുടെയും ഉന്നത ബന്ധങ്ങളുടെയും സാമ്പത്തിക ഇടപാടുകളുടെയും കൂടുതൽ വിവരങ്ങൾ പുറത്തുവരുമെന്ന പ്രതീക്ഷയിലാണ് അന്വേഷണ സംഘം.
