കോഴിക്കോട്: തിരുവമ്പാടിയില് കെഎസ്ആര്ടിസി ബസ് മറിഞ്ഞുണ്ടായ അപകടത്തില് മരിച്ചവരുടെ കുടുംബത്തിന് ധനസഹായം പ്രഖ്യാപിച്ച് സര്ക്കാര്. എംഎല്എ ലിന്റോ ജോസഫാണ് ഇക്കാര്യം അറിയിച്ചത്. അപകടത്തില് മരണപ്പെട്ട രണ്ടുപേരുടെയും കുടുംബാംഗങ്ങള്ക്ക് പത്ത് ലക്ഷം രൂപ വീതം ധനസഹായമാണ് നല്കുക.
അതേസമയം അപകടം ഡ്രൈവറുടെ അശ്രദ്ധ കാരണമാണെന്ന് പ്രാഥമിക അന്വേഷണത്തില് തെളിഞ്ഞിരുന്നു. ബസ്സിന്റെ ടയറുകള്ക്കോ ബ്രേക്ക് സിസ്റ്റത്തിനോ കുഴപ്പമില്ലെന്നാണ് പ്രാഥമിക പരിശോധനയില് കണ്ടെത്തിയത്.
എതിര്വശത്ത് നിന്നും വാഹനങ്ങളൊന്നും എത്തിയിരുന്നുമില്ല. ഗതാഗത മന്ത്രി ഗതാഗത സെക്രട്ടറിയോട് ആവശ്യപ്പെട്ടത് പ്രകാരം എന്ഫോഴ്സ്മെന്റ് ആര് ടി ഒ പ്രാഥമിക അന്വേഷണ റിപ്പോര്ട്ട് സമര്പ്പിച്ചു.
