തിരുവനന്തപുരം: ചിറയിൻകീഴിലെ കെഎസ്ആർടിസി ബസ് സർവീസ് ഉദ്ഘാടന വിവാദത്തിൽ സിപിഐ പരാതി നൽകി. മന്ത്രി ബിന്ദു കൃഷ്ണയുടെ ഭർത്താവും ഡിസിസി ജനറൽ സെക്രട്ടറിയുമായ എസ്. കൃഷ്ണകുമാർ ഉദ്ഘാടനം നിർവഹിച്ചതിനെതിരെ പ്രോട്ടോക്കോൾ ലംഘനം ചൂണ്ടിക്കാട്ടിയാണ് കെഎസ്ആർടിസി സി.എം.ഡിക്ക് പരാതി നൽകിയത്.
ചിറയിൻകീഴിൽനിന്ന് കൊല്ലത്തേക്കുള്ള പുതിയ കെഎസ്ആർടിസി ഫാസ്റ്റ് പാസഞ്ചർ സർവീസിന്റെ ഉദ്ഘാടനമാണ് എസ്. കൃഷ്ണകുമാർ നിർവഹിച്ചത്. രമ്യ ഹരിദാസ് എംഎൽഎയെയായിരുന്നു ഉദ്ഘാടകയായി നിശ്ചയിച്ചിരുന്നത്. എന്നാൽ, രമ്യ പങ്കെടുക്കേണ്ട തിരുവനന്തപുരത്തെ പാർട്ടി പരിപാടി നീണ്ടുപോയതിനാലാണ് ഉദ്ഘാടകനെ മാറ്റിയതെന്നാണ് കോൺഗ്രസിന്റെ വിശദീകരണം. അതേസമയം, സംഭവത്തിൽ കൃഷ്ണകുമാർ ഇതുവരെ പ്രതികരിച്ചിട്ടില്ല.
ഒരു രാഷ്ട്രീയ പാർട്ടിയുടെ ഭാരവാഹി എങ്ങനെ കെഎസ്ആർടിസി സർവീസിന്റെ ഉദ്ഘാടകനായെന്ന ചോദ്യമാണ് സിപിഐ ഉയർത്തുന്നത്. മന്ത്രിയുടെ ഭർത്താവ് എന്ന നിലയിലുള്ള വ്യക്തിപരമായ സ്വാധീനം ഉപയോഗിച്ചാണ് ഉദ്ഘാടനം നടത്തിയതെന്നും പരാതിയിൽ ആരോപിക്കുന്നു.
മുൻ പഞ്ചായത്ത് അംഗവും കേരള സർവകലാശാലയിലെ മുൻ സിൻഡിക്കേറ്റ് അംഗവുമാണ് കൃഷ്ണകുമാർ. പരാതി പരിശോധിക്കുമെന്ന് കെഎസ്ആർടിസി അറിയിച്ചു. ചിറയിൻകീഴിൽ രമ്യ ഹരിദാസ് ഉൾപ്പെട്ട കയ്യാങ്കളി വിവാദത്തിന് പിന്നാലെയാണ് മന്ത്രിയുടെ ഭർത്താവിന്റെ ഉദ്ഘാടനവും രാഷ്ട്രീയ ചർച്ചയായത്.
