കൊച്ചി: നടൻ മോഹൻലാലിന് ഓസ്ട്രേലിയയിലേക്ക് പോകാനുള്ള വിസ ലഭിക്കാത്തതിനെ തുടർന്ന് സിഡ്നിയിൽ നടത്താനിരുന്ന ഷോ മാറ്റിവെച്ചു. മോഹൻലാൽ ഒഴികെയുള്ള താരങ്ങളും അണിയറപ്രവർത്തകരും ഓസ്ട്രേലിയയിൽ എത്തിയിരുന്നു. വിസ ലഭിക്കാത്തതിനാൽ പരിപാടിയിൽ പങ്കെടുക്കാൻ കഴിയില്ലെന്ന് മോഹൻലാൽ അറിയിച്ചു. സംഭവത്തിൽ സംഘാടകരോടും ആരാധകരോടും അദ്ദേഹം വീഡിയോ സന്ദേശത്തിലൂടെ ക്ഷമ ചോദിച്ചു.
വിസ ലഭിക്കാത്തതിന്റെ കാരണം എന്താണെന്ന് അറിയില്ലെന്നും സാങ്കേതിക പിഴവാണോ ക്ലറിക്കൽ മിസ്റ്റേക്കാണോ എന്ന് വ്യക്തമല്ലെന്നും മോഹൻലാൽ പറഞ്ഞു. ഇക്കാര്യം കൂടുതൽ വിശദീകരിക്കാൻ താൻ ആഗ്രഹിക്കുന്നില്ലെന്നും അദ്ദേഹം വ്യക്തമാക്കി.
തനിക്ക് ഓസ്ട്രേലിയയിലേക്ക് എത്താൻ കഴിയാത്തതിൽ വിഷമമുണ്ടെന്നും മോഹൻലാൽ പറഞ്ഞു. താനൊഴികെ സംഘത്തിലെ എല്ലാവരും അവിടെയുണ്ടെന്നും എന്താണ് പറയേണ്ടതെന്ന് അറിയില്ലെന്നും പറഞ്ഞ അദ്ദേഹം സംഭവത്തിൽ വീണ്ടും ക്ഷമ ചോദിച്ചു. ഷോയുടെ പുതുക്കിയ തീയതി സംഘാടകർ പിന്നീട് അറിയിക്കും.
