കോട്ടയം: അൽഫോൻസാ കോളേജ് ഇംഗ്ലീഷ് വിഭാഗത്തിൻ്റെ ആഭിമുഖ്യത്തിൽ സംഘടിപ്പിച്ച ദ്വിദിന ദേശീയ സെമിനാർ സമാപിച്ചു. പ്രശസ്ത സാമൂഹ്യപ്രവർത്തക ദയാബായി ഉദ്ഘാടനം ചെയ്ത സെമിനാറിന്റെ രണ്ടാം ദിനത്തിൽ ഐ.ഐ.ടി ഹൈദരാബാദിലെ ഡോ. ആനന്ദിതാ പാൻ, പ്രശസ്ത കവിയും ചിത്രകാരനുമായ എം.ആർ. രേണുകുമാർ എന്നിവർ വിവിധ വിഷയങ്ങളിൽ ക്ലാസുകൾ നയിച്ചു.
അധ്യാപകരും ഗവേഷകരും വിദ്യാർത്ഥികളുമടക്കം അമ്പതോളം പേർ സെമിനാറിൽ പ്രബന്ധങ്ങൾ അവതരിപ്പിച്ചു. മനുഷ്യൻ്റെ നൈസർഗികമായ സർഗ്ഗവാസനകൾ കഴിഞ്ഞകാല അനുഭവങ്ങളുമായി ചേരുമ്പോഴാണ് ഉത്തമമായ കലയും കവിതയും ജനിക്കുന്നതെന്ന് സമാപന സമ്മേളനത്തിൽ മുഖ്യാതിഥിയായിരുന്ന എം.ആർ. രേണുകുമാർ അഭിപ്രായപ്പെട്ടു.
ചടങ്ങിൽ ഇംഗ്ലീഷ് വിഭാഗത്തിലെ അധ്യാപകരും വിദ്യാർത്ഥികളും ചേർന്ന് രചിച്ച ‘സീസൺസ്’ എന്ന കവിതാസമാഹാരം എം.ആർ. രേണുകുമാർ പ്രകാശനം ചെയ്തു. കോളേജ് ബർസാർ റവ. ഫാ. കുര്യാക്കോസ് വെള്ളച്ചാലിൽ പുസ്തകത്തിൻ്റെ ആദ്യപ്രതി ഏറ്റുവാങ്ങി. കോളേജ് പ്രിൻസിപ്പൽ പ്രഫ. ഡോ. സി. മിനിമോൾ മാത്യു അധ്യക്ഷത വഹിച്ച ചടങ്ങിൽ വൈസ് പ്രിൻസിപ്പൽ മഞ്ജു ജോസ്, ഇംഗ്ലീഷ് വിഭാഗം അധ്യക്ഷ ഡോ. സോണിയ സെബാസ്റ്റ്യൻ, സെമിനാർ കൺവീനർ ആഷ്ലി തോമസ്, കോ-കൺവീനർ അശ്വതി എൻ. എന്നിവർ പ്രസംഗിച്ചു.
