കണ്ണൂര് മുന് എഡിഎം നവീന് ബാബുവിന്റെ മരണത്തില് സിബിഐ അന്വേഷണം വേണമെന്ന കുടുംബത്തിന്റെ ആവശ്യം തള്ളി സിപിഐഎം. സിബിഐ അന്വേഷണത്തെ കുറിച്ച് പാര്ട്ടിക്ക് വ്യക്തമായ ധാരണയുണ്ടെന്ന് സംസ്ഥാന സെക്രട്ടറി എംവി ഗോവിന്ദന് പറഞ്ഞു. സിബിഐ കൂട്ടിലടച്ച തത്തയാണെന്നും ആ നിലപാടില് മാറ്റമില്ലെന്നും അദ്ദേഹം പ്രതികരിച്ചു.
സിബിഐ അന്വേഷണമാണ് എല്ലാത്തിന്റെയും അവസാനം എന്ന നിലപാട് സിപിഐഎം ഒരിക്കലും സ്വീകരിച്ചിട്ടില്ല. സിബിഐ അന്വേഷണം വേണമെന്ന നവീന് ബാബുവിന്റെ കുടുംബത്തിന്റെ ആവശ്യത്തില് കോടതി തീരുമാനമെടുക്കട്ടെ എന്നും ഗോവിന്ദന് പറഞ്ഞു.
കഴിഞ്ഞ ദിവസമാണ് കേന്ദ്രഏജന്സിയുടെ അന്വേഷണമെന്ന ആവശ്യം ഉന്നയിച്ച് നവീന് ബാബുവിന്റെ ഭാര്യ മഞ്ജുഷ ഹൈക്കോടതിയെ സമീപിച്ചത്. ഇന്ന് കേസ് പരിഗണിച്ച കോടതി പൊലീസിനോട് കേസ് ഡയറി ഹാജരാക്കാന് നിര്ദേശിച്ചിട്ടുണ്ട്.
