സംസ്ഥാനത്ത് പ്ലസ് വൺ പ്രവേശനത്തിന് ഇന്നു കൂടി അപേക്ഷിക്കാം. ഹയർ സെക്കൻഡറി/വിഎച്ച്എസ്ഇ പ്രവേശനത്തിന്റെ അപേക്ഷ സമർപ്പണം ഇന്ന് (മെയ് 20) വൈകിട്ട് അഞ്ചിന് അവസാനിക്കും.
മോഡൽ റെസിഡൻഷ്യൽ സ്‌കൂളുകളിലേയ്ക്കുള്ള അപേക്ഷാ സമർപ്പണത്തിനുള്ള സമയപരിധിയും ഇന്നുവരെയാണ്. ട്രയൽ അലോട്മെന്റ് 24നു വൈകിട്ടു നാലിനു പ്രസിദ്ധീകരിക്കും. ആദ്യ അലോട്മെന്റ് ജൂൺ രണ്ടിനും രണ്ടാം അലോട്മെന്റ് 10നും മൂന്നാം അലോട്മെന്റ് 16നുമാണ്. 18നു പ്ലസ് വൺ ക്ലാസുകൾ ആരംഭിക്കും.

പ്ലസ് വണിന് അപേക്ഷിക്കുന്നവർ പേര് രേഖപ്പെടുത്തുമ്പോൾ തെറ്റിയാൽ തിരുത്താൻ കഴിയുന്നില്ലെന്നു പരാതി. ഈ വർഷം ഏർപ്പെടുത്തിയ പരിഷ്കാരമാണ് അപേക്ഷകരെ വലയ്ക്കുന്നത്. പേരു തെറ്റിയവർക്ക് പ്രവേശന സമയത്തു തിരുത്താമെന്നാണ് ഹെൽപ്‌ലൈനിൽനിന്നുള്ള മറുപടി. എസ്എസ്എൽസി റജിസ്റ്റർ നമ്പർ രേഖപ്പെടുത്തിയാൽ അപേക്ഷകരുടെ വിവരങ്ങൾ സ്വയം പൂരിപ്പിക്കുന്ന തരത്തിലായിരുന്നു കഴിഞ്ഞവർഷം വരെയുണ്ടായിരുന്ന സംവിധാനം.