കോഴിക്കോട്: നന്മണ്ടയിൽ കോൺഗ്രസ് നേതാവ് കരിപ്പാല ബാബുവിന്റെ വീട്ടിലേക്ക് സ്ഫോടക വസ്തുക്കൾ എറിഞ്ഞതായി പരാതി. ഇന്നലെ രാത്രിയിലായിരുന്നു സംഭവം. സംഭവവുമായി ബന്ധപ്പെട്ട് പോലീസിൽ ഔദ്യോഗികമായി പരാതി നൽകിയിട്ടുണ്ട്.
സംഭവത്തിൽ ശക്തമായ പ്രതിഷേധം രേഖപ്പെടുത്തി നന്മണ്ടയിൽ യൂത്ത് കോൺഗ്രസ് നടത്തിയ പ്രതിഷേധ പ്രകടനത്തിലേക്ക് ഏകദേശം അൻപതോളം ഡി.വൈ.എഫ്.ഐ പ്രവർത്തകർ എത്തി അക്രമം അഴിച്ചുവിട്ടുവെന്നാണ് കോൺഗ്രസ് നേതാക്കളുടെ ആരോപണം. പ്രതിഷേധ പ്രകടനത്തിനിടെയുണ്ടായ സംഘർഷത്തിൽ നിരവധി പേർക്ക് പരിക്കേറ്റതായാണ് വിവരം.
ജനങ്ങളുടെ അഭിപ്രായവും പ്രതിഷേധവും അംഗീകരിക്കുന്നതിന് പകരം അക്രമത്തിലൂടെ പ്രതികരിക്കുന്നത് ജനാധിപത്യത്തിന് നേരെയുള്ള ഗുരുതര വെല്ലുവിളിയാണെന്ന് നന്മണ്ട മണ്ഡലം കോൺഗ്രസ് കമ്മിറ്റി വിലയിരുത്തി. പ്രദേശത്ത് സമാധാനാന്തരീക്ഷം തകർക്കുന്ന ഇത്തരം നടപടികൾ അവസാനിപ്പിക്കണമെന്നും കുറ്റക്കാർക്കെതിരെ കർശന നടപടി സ്വീകരിക്കണമെന്നും കോൺഗ്രസ് നേതൃത്വം ആവശ്യപ്പെട്ടു.
നന്മണ്ടയിൽ സമാധാനം പുനസ്ഥാപിക്കാൻ പോലീസ് അടിയന്തര ഇടപെടൽ നടത്തണമെന്നും പ്രദേശത്തെ ജനങ്ങളുടെ സുരക്ഷ ഉറപ്പാക്കണമെന്നും നേതാക്കൾ ആവശ്യപ്പെട്ടു. സംഭവവുമായി ബന്ധപ്പെട്ട് പോലീസ് അന്വേഷണം ആരംഭിച്ചിട്ടുണ്ട്.
