ന്യൂഡൽഹി: ഉത്തരേന്ത്യൻ സംസ്ഥാനങ്ങളിൽ മഴക്കെടുതി രൂക്ഷമായി തുടരുന്നു. കനത്ത മഴയെ തുടർന്നുണ്ടായ വിവിധ അപകടങ്ങളിലായി ഇതുവരെ 62 പേർ മരിച്ചതായി സർക്കാർ അറിയിച്ചു. മൂന്ന് ദിവസമായി തുടരുന്ന ശക്തമായ മഴയിൽ 46 പേർക്ക് പരിക്കേറ്റു. ആയിരത്തിലധികം വീടുകൾക്ക് കേടുപാടുകൾ സംഭവിച്ചിട്ടുണ്ട്. മഴ ശക്തമായി തുടരുന്ന സാഹചര്യത്തിൽ സ്കൂളുകൾ ഉൾപ്പെടെയുള്ള വിദ്യാഭ്യാസ സ്ഥാപനങ്ങൾക്ക് അവധി തുടരുകയാണ്.

സംസ്ഥാനത്ത് സാധാരണ ലഭിക്കേണ്ടതിന്റെ പത്തിരട്ടിയിലധികം മഴയാണ് ലഭിച്ചതെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. 75 ജില്ലകളിൽ 56 ജില്ലകളിലും അതിതീവ്ര മഴ രേഖപ്പെടുത്തി. കനത്ത മഴയെയും വെള്ളപ്പൊക്ക സാധ്യതയെയും തുടർന്ന് ഒഡീഷയിൽ 75,000 പേരെ സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചു.