ന്യൂഡല്ഹി: കനത്ത മഴയില് ഹിമാചല്പ്രദേശില് ഇതുവരെ 63 മരണവും 400 കോടിയുടെ നാശനഷ്ടവും ഉണ്ടായെന്ന് സംസ്ഥാന ദുരന്ത നിവാരണ സേന. രക്ഷാപ്രവര്ത്തനം നടക്കുന്ന സാഹചര്യത്തിലും മരണസംഖ്യ ഇനിയും ഉയരുമെന്നാണ് സൂചന. ജൂലൈ ഏഴുവരെ ദേശീയ കാലാവസ്ഥാ വകുപ്പ് സംസ്ഥാനത്ത് കനത്ത മഴ മുന്നറിയിപ്പ് നല്കിയിട്ടുണ്ട്. ഇത് സംബന്ധിച്ചുള്ള ജാഗ്രത നിര്ദേശങ്ങള് ജനങ്ങള്ക് നല്കിയതായും സര്ക്കാര് അറിയിച്ചു.
മാണ്ഡി, ഷിംല എന്നിവിടങ്ങളിലാണ് മഴക്കെടുതി വലിയ രീതിയില് ബാധിച്ചത്. മാണ്ഡിയില് 40 ലധികം പേരെ കാണാതായിട്ടുണ്ട്. ആഹാരം, വൈദ്യുതി, ഗതാഗതം തുടങ്ങി അടിസ്ഥാന സൗകര്യങ്ങള് പലയിടത്തും താറുമാറായി. ദുരന്തബാധിതര്ക്കായി ക്യാമ്പുകള് തുറക്കുകയും അടിസ്ഥാന സൗകര്യങ്ങള് ഉറപ്പാക്കുകയും ചെയ്തിട്ടുണ്ട്. സ്കൂളുകളില് വെള്ളം കയറിയതിനാല് വിദ്യാഭ്യാസ മേഖലയും പ്രതിസന്ധിയിലായി.
സംസ്ഥാനത്ത് ഇതുവരെ മഴക്കെടുതിയില് 37 മരണവും ഗതാഗതക്കുരുക്കില്പ്പെട്ട് 26 മരണവുമാണ് റിപ്പോര്ട്ട് ചെയ്തിരിക്കുന്നത്.
ദുരന്ത ബാധിത മേഖലകളിലെ തിരച്ചിലും രക്ഷാപ്രവര്ത്തനങ്ങളും ജില്ലാ ഭരണകൂടം, പോലീസ്, ഹോം ഗാര്ഡ്സ്, എസ്ഡിആര്എഫ്, എന്ഡിആര്എഫ് ഉള്പ്പെടെയുള്ള കേന്ദ്ര സേനകള് എന്നിവയുടെ നേതൃത്വത്തില് പുരോഗമിച്ചുകൊണ്ടിരിക്കുകയാണ്. സംസ്ഥാനത്ത് കനത്ത മഴയ്ക്കുള്ള ജാഗ്രതാ നിര്ദ്ദേശം കണക്കിലെടുത്ത് അധികൃതര് ജാഗ്രത പാലിക്കുകയും സാഹചര്യം നിരീക്ഷിക്കുകയും ചെയ്യുന്നുണ്ട്.
