മുംബൈ: ന്യൂസിലൻഡ് എ ടീമിനെതിരായ ഇന്ത്യ എയുടെ ആദ്യ രണ്ട് ചതുർദിന മത്സരങ്ങളിൽ നിന്ന് വിക്കറ്റ് കീപ്പർ ബാറ്റർ റിഷഭ് പന്തിനെ ഒഴിവാക്കി. ഇറാനി കപ്പിനിടെ പരിക്കേറ്റ താരം നിലവിൽ ബിസിസിഐയുടെ മെഡിക്കൽ സംഘത്തിന്റെ നിരീക്ഷണത്തിലാണ്. പന്തിന്റെ ശാരീരികക്ഷമത പരിഗണിച്ചായിരിക്കും മൂന്നാം മത്സരത്തിൽ കളിപ്പിക്കുന്ന കാര്യത്തിൽ തീരുമാനമെടുക്കുകയെന്ന് ബിസിസിഐ അറിയിച്ചു.
സെപ്റ്റംബറിൽ റെസ്റ്റ് ഓഫ് ഇന്ത്യയെ നയിക്കുന്നതിനിടെയാണ് പന്തിന് പരിക്കേറ്റത്. ഫിറ്റ്നസ് വിലയിരുത്തിയ ശേഷമാണ് ന്യൂസിലൻഡ് എയ്ക്കെതിരായ പരമ്പരയ്ക്കുള്ള ടീമിൽ താരത്തെ ഉൾപ്പെടുത്തിയിരുന്നത്. നിലവിൽ പരിക്കിൽനിന്ന് താരം സുഖം പ്രാപിച്ചുവരികയാണെന്നാണ് ബിസിസിഐയുടെ വിശദീകരണം.
നവംബർ 19 മുതൽ ഡിസംബർ 1 വരെ നടക്കാനിരിക്കുന്ന ഇന്ത്യയുടെ സീനിയർ ടെസ്റ്റ് പരമ്പരയ്ക്ക് മുന്നോടിയായി പന്തിന്റെ പരിക്ക് ആശങ്കയാകുന്നുണ്ട്. അതേസമയം, സീനിയർ ടീമിന്റെ അന്തിമ സ്‌ക്വാഡ് ഇതുവരെ പ്രഖ്യാപിച്ചിട്ടില്ല.
പന്തിന് പകരക്കാരനായി 21കാരനായ ജാർഖണ്ഡ് വിക്കറ്റ് കീപ്പർ ബാറ്റർ കുമാർ കുഷാഗ്രയെ ആദ്യ രണ്ട് മത്സരങ്ങൾക്കുള്ള ടീമിൽ ഉൾപ്പെടുത്തി. സമീപകാലത്തെ മികച്ച പ്രകടനങ്ങളാണ് കുഷാഗ്രയ്ക്ക് അവസരമൊരുക്കിയത്. ദുലീപ് ട്രോഫി ഫൈനലിലും ഓസ്‌ട്രേലിയ എയ്ക്കെതിരായ ഇന്ത്യ എ മത്സരത്തിലും സെഞ്ചുറി നേടിയ താരം മികച്ച ഫോമിലാണ്.
വിക്കറ്റ് കീപ്പർ ബാറ്ററായ ധ്രുവ് ജുറെലാണ് ഇന്ത്യ എ ടീമിനെ നയിക്കുന്നത്. യശസ്വി ജയ്‌സ്വാൾ, കെ.എൽ. രാഹുൽ, ദേവ്ദത്ത് പടിക്കൽ, സായി സുദർശൻ തുടങ്ങിയ പ്രമുഖരും ടീമിലുണ്ട്.
ഇന്ത്യ എയുടെ പുതുക്കിയ സ്‌ക്വാഡ്: യശസ്വി ജയ്‌സ്വാൾ, കെ.എൽ. രാഹുൽ, ദേവ്ദത്ത് പടിക്കൽ, രവിചന്ദ്രൻ സ്മരൺ, ധ്രുവ് ജുറെൽ (ക്യാപ്റ്റൻ, വിക്കറ്റ് കീപ്പർ), വാഷിംഗ്ടൺ സുന്ദർ, അക്വിബ് നബി, ആകാശ് ദീപ്, അൻഷുൽ കാംബോജ്, മാനവ് സുതർ, മുകേഷ് ചൗധരി, സായി സുദർശൻ, യാഷ് റാത്തോഡ്, മുകേഷ് കുമാർ, കുമാർ കുഷാഗ്ര (വിക്കറ്റ് കീപ്പർ).
