കറാച്ചി: പാകിസ്ഥാനിലെ പഞ്ചാബ് പ്രവിശ്യയിൽ ട്രെയിൻ പാളം തെറ്റി അഞ്ച് പേർ മരിച്ചു. നിരവധി പേർക്ക് പരിക്കേറ്റു. ചൊവ്വാഴ്ച പുലർച്ചെ 5.15ഓടെ ഷേർ ഷായിലാണ് അപകടമുണ്ടായത്. കറാച്ചിയിൽ നിന്ന് പേഷ്വാറിലേക്ക് പോവുകയായിരുന്ന റെഹ്മാൻ ബാബ എക്സ്പ്രസാണ് അപകടത്തിൽപ്പെട്ടത്. പാളം തെറ്റിയതിനെ തുടർന്ന് പരിക്കേറ്റവരെ മുൾട്ടാനിലെ നിഷ്താർ ആശുപത്രിയിൽ പ്രവേശിപ്പിച്ചു. അപകടത്തിന്റെ കൂടുതൽ വിവരങ്ങൾ പുറത്തുവന്നിട്ടില്ല.

പാകിസ്ഥാനിൽ ട്രെയിൻ അപകടങ്ങൾ പതിവാകുന്നതിൽ റെയിൽവേ മേഖലയിലെ അടിസ്ഥാന സൗകര്യങ്ങളുടെ കുറവും ആശങ്കയുണ്ടാക്കുന്നുണ്ട്. ആവശ്യമായ നിക്ഷേപം ലഭിക്കാത്തതിനാൽ റെയിൽവേ ട്രാക്കുകളുടെയും സിഗ്നലിങ് സംവിധാനങ്ങളുടെയും അറ്റകുറ്റപ്പണികൾ മുടങ്ങിക്കിടക്കുന്നതായാണ് റിപ്പോർട്ടുകൾ. 2023ൽ തെക്കൻ പാകിസ്ഥാനിലുണ്ടായ ട്രെയിൻ അപകടത്തിൽ പത്ത് ബോഗികൾ പാളം തെറ്റുകയും 30 പേർ മരിക്കുകയും ചെയ്തിരുന്നു.