കൊല്ലം: ശബരിമല സ്വർണക്കൊള്ള കേസിൽ ദേവസ്വം ബോർഡിന്റെ മുൻ അംഗം എൻ. വിജയകുമാറിന് ജാമ്യം നിഷേധിച്ചു. കൊല്ലം വിജിലൻസ് കോടതിയാണ് രണ്ട് ജാമ്യഹർജികളും തള്ളിയത്.
ആരോഗ്യ പ്രശ്നങ്ങൾ ഉൾപ്പെടെ ചൂണ്ടിക്കാട്ടിയാണ് വിജയകുമാർ ജാമ്യത്തിനായി കോടതിയെ സമീപിച്ചത്. എന്നാൽ കേസിന്റെ സ്വഭാവം പരിഗണിച്ച് ജാമ്യം അനുവദിക്കാനാകില്ലെന്ന് കോടതി വ്യക്തമാക്കി.
സ്വർണക്കൊള്ളയിൽ തനിക്കൊരു പങ്കുമില്ലെന്നും മുൻ ദേവസ്വം ബോർഡ് പ്രസിഡന്റ് എ. പത്മകുമാറിന്റെ നിർദേശപ്രകാരമാണ് ബന്ധപ്പെട്ട രേഖകളിൽ ഒപ്പുവെച്ചതെന്നുമാണ് വിജയകുമാർ കോടതിയിൽ മൊഴി നൽകിയിരുന്നത്. കേസിൽ അന്വേഷണം തുടരുകയാണ്.
