പാലക്കാട്: പോത്തുണ്ടി സജിത വധക്കേസില് പ്രതി ചെന്താമരയുടെ ജാമ്യം റദ്ദാക്കി കോടതി. ചെന്താമര ജാമ്യ വ്യവസ്ഥ പൂര്ണമായും ലംഘിച്ചെന്ന് കണ്ടെത്തിയതിനെ തുടര്ന്നാണ് പാലക്കാട് സെഷന്സ് കോടതിയുടെ നടപടി. സജിതയെ കൊലപ്പെടുത്തിയ കേസില് ജാമ്യത്തില് ഇറങ്ങിയ ശേഷമായിരുന്നു സജിതയുടെ ഭര്ത്താവ് സുധാകരനേയും ഭര്തൃമാതാവ് ലക്ഷ്മിയേയും ചെന്താമര കൊലപ്പെടുത്തിയത്.
2019ലായിരുന്നു സജിതയെ ചെന്താമര കൊലപ്പെടുത്തുന്നത്. വീട്ടില് അതിക്രമിച്ചെത്തിയ ചെന്താമര സജിതയെ കഴുത്തറുത്ത് കൊല്ലുകയായിരുന്നു. ഭാര്യ പിണങ്ങിപ്പോകാന് കാരണം അയല്വാസികളായ സജിതയും പുഷ്പയുമാണെന്നായിരുന്നു ചൊന്താമരയുടെ വിശ്വാസം. ഇരുവരും കൂടോത്രം നടത്തിയതാണ് ഭാര്യ തന്നില് നിന്ന് അകലാന് കാരണമെന്നും ഇയാള് വിശ്വസിച്ചിരുന്നു. ഇതിന്റെ വൈരാഗ്യത്തിലായിരുന്നു സജിതയെ ചെന്താമര കൊലപ്പെടുത്തിയത്.
