ന്യൂഡൽഹി : സംസ്ഥാനത്ത് വ്യവസായ രംഗത്ത് മികച്ച മാറ്റങ്ങളാണ് ഉണ്ടായിരുന്നതെന്നും , കേരളം മാറ്റത്തിന്റെ പാതയിലെന്നും കോണ്ഗ്രസ് നേതാവ് ശശി തരൂര് എംപി. ‘ചെയ്ഞ്ചിംഗ് കേരള; ലംബറിങ് ജമ്പോ റ്റു എ ലൈത് ടൈഗര്‘ എന്ന പേരില് ദ ന്യൂ ഇന്ത്യന് എക്സ്പ്രസില് എഴുതിയ ലേഖനത്തിലാണ് കേരളത്തില് വന്ന മാറ്റങ്ങള് അദേഹം തുറന്നുകാട്ടിയിരിക്കുന്നത്. ഈസ് ഓഫ് ഡൂയിങ് ബിസിനസില് 28ാം സ്ഥാനത്തുണ്ടായിരുന്ന കേരളം ഒന്നാം സ്ഥാനത്തേക്കെത്തിയതിനെയും തരൂര് പ്രശംസിച്ചു . വിദേശരാജ്യങ്ങളിൽ ഒരു ബിസിനസ് തുടങ്ങാന് മൂന്ന് ദിവസം എടുക്കുമ്പോള്, ഇന്ത്യയിൽ അത് ശരാശരി 114 ദിവസം എടുക്കും.
എന്നാൽ കേരളത്തിലേക്ക് വരുമ്പോൾ അത് 236 ദിവസമാകും. അതേസമയം രണ്ടാഴ്ച മുമ്പ് ‘രണ്ട് മിനിറ്റിനുള്ളില്’ ഒരു ബിസിനസ് തുടങ്ങാന് കഴിയുമെന്ന് വ്യവസായ മന്ത്രി പി രാജീവ് പ്രഖ്യാപിച്ചു. കേരളത്തെക്കുറിച്ച് നമ്മളെല്ലാവരും കേട്ടതും കരുതിയതുമായ കാര്യങ്ങളില് നിന്നുള്ള സ്വാഗതാര്ഹമായ മാറ്റമാണെന്നും ശശി തരൂര് ഇതേക്കുറിച്ച് വ്യക്തമാക്കി.
എഐ, ബ്ലോക്ക്ചെയിന് സാങ്കേതികവിദ്യ, മെഷീന് ലേണിംഗ് എന്നിവയുള്പ്പെടെ വിജ്ഞാനാധിഷ്ഠിത വ്യവസായങ്ങളില് ശ്രദ്ധ കേന്ദ്രീകരിച്ച് സംസ്ഥാനം ഒരു പുതിയ വ്യവസായ നയം നടപ്പാക്കിയിട്ടുണ്ടെന്നും അദേഹം പറഞ്ഞു. ശശി തരൂരിന്റെ ഈ അഭിനന്ദനം സര്ക്കാര് നടത്തിയ പ്രവര്ത്തനങ്ങള്ക്കുള്ള അംഗീകാരം കൂടിയാണ്.കേരളം വ്യാവസായിക രംഗത്ത് നേടിയ നേട്ടങ്ങളെ വളരെ പോസിറ്റീവായി അദ്ദേഹം നോക്കിക്കാണുന്നു. തരൂരിന്റെ ലേഖനം മന്ത്രി പി രാജീവ് ഫേസ്ബുക്കില് പങ്കുവെച്ചിട്ടുണ്ട്.
