തിരുവനന്തപുരം: കടൽ മണല് ഖനനത്തിനെതിരെ ഇന്ന് അര്ധരാത്രി മുതല് 24 മണിക്കൂര് തീരദേശ ഹര്ത്താല് ആഹ്വാനം ചെയ്ത ഫിഷറീസ് കോഓര്ഡിനേഷന് കമ്മിറ്റി. ഹർത്താലിന് എല്ഡിഎഫ്, യുഡിഎഫ് മുന്നണികള്ക്കൊപ്പം ലത്തീന് രൂപതകളും ധീവരസഭയും തീരദേശത്തെ വിവിധ മുസ്ലിം ജമാഅത്തുകളും പിന്തുണ പ്രഖ്യാപിച്ചതായി കമ്മിറ്റി ജനറല് കണ്വീനര് പി പി ചിത്തരഞ്ജന് എംഎല്എ അറിയിച്ചു.
കൂടാതെ ഹർത്താലിന് തൊഴിലാളി സംഘടനകള്, ഫിഷ് മര്ച്ചന്റ്സ് അസോസിയേഷന്, ഐസ് ഫാക്ടറി ഉടമകളുടെ സംഘടനകള്, ബോട്ട് ഓണേഴ്സ് സംഘടനകള് തുടങ്ങിയവയുടെ പിന്തുണയുമുണ്ട്. നാളെ രാവിലെ 9ന് സംസ്ഥാനത്തെ 125 കേന്ദ്രങ്ങളില് പ്രതിഷേധ സമ്മേളനങ്ങള് നടക്കും.ഹര്ത്താലില് മത്സ്യത്തൊഴിലാളികള് കടലില് പോകില്ലെന്നും മത്സ്യബന്ധന തുറമുഖങ്ങള്, ഫിഷ് ലാന്ഡിങ് സെന്ററുകള്, മത്സ്യച്ചന്തകള് എന്നിവയുടെ പ്രവര്ത്തനം സ്തംഭിക്കുമെന്നും ഭാരവാഹികള് അറിയിച്ചു.
