മലപ്പുറം: ചുങ്കത്തറ സ്വദേശിയായ ശാന്തിക്കാരൻ ക്ഷേത്രത്തിലെ വെള്ളി നിലവിളക്ക് മോഷ്ടിച്ച കേസിൽ പിടിയിൽ. ആത്തൂർ വീട്ടിൽ അതുൽ കൃഷ്ണ (21) ആണ് പിടിയിലായത്. കൊമ്പൻകല്ല് മഹാദേവ ക്ഷേത്രംൽ മാർച്ച് 29നാണ് ഒരു ലക്ഷം രൂപയ്ക്കുമുകളിൽ വിലവരുന്ന, 450 ഗ്രാം തൂക്കം വരുന്ന വെള്ളി നിലവിളക്ക് മോഷ്ടിക്കപ്പെട്ടത്. ക്ഷേത്ര ഭരണസമിതിയുടെ പരാതിയിൽ നിലമ്പൂർ പൊലീസ് കേസ് രജിസ്റ്റർ ചെയ്തിരുന്നു.
പ്രതിഷ്ഠാദിനത്തിന് ശേഷം സ്ഥിരം ശാന്തിക്കാരന് അവധി ആയിരുന്ന ദിവസം പകരക്കാരനായി പൂജയ്ക്ക് എത്തിയപ്പോഴാണ് അതുൽ കൃഷ്ണ മോഷണം നടത്തിയതെന്ന് അന്വേഷണത്തിൽ കണ്ടെത്തി. മോഷ്ടിച്ച നിലവിളക്ക് കോഴിക്കോട് പാളയത്തെ ജ്വല്ലറിയിൽ ഒരു ലക്ഷം രൂപയ്ക്ക് വിറ്റതായും പൊലീസ് വ്യക്തമാക്കി.
ഇതിനുമുമ്പ്, അകംമ്പാടം പൊക്കോട് കിരാതമൂർത്തി ക്ഷേത്രത്തിൽ പൂജയ്ക്കെത്തിയപ്പോൾ വിഗ്രഹത്തിലെ സ്വർണപ്പൊട്ട് മോഷ്ടിച്ചതുമായി ബന്ധപ്പെട്ട് ഇയാളെ പിടികൂടിയിരുന്നു. ഈ കേസിൽ ചോദ്യം ചെയ്യുന്നതിനിടെയാണ് കൊമ്പൻകല്ല് ക്ഷേത്രത്തിലെ മോഷണവും വെളിവായത്.
