തൃശ്ശൂർ: ജില്ലയിലെ എല്ലാ താലൂക്ക് ഓഫീസുകളിലും വില്ലേജ് ഓഫീസുകളിലും ഇന്നലെയുണ്ടായ അവധിക്കിടയിലും എസ്.ഐ.ആർ ഡിജിറ്റൈസേഷൻ ക്യാമ്പുകൾ സജീവമായി പ്രവർത്തിച്ചതായി തൃശ്ശൂർ ജില്ലാ കളക്ടർ അറിയിച്ചു.
വോട്ടർമാർക്ക് എന്യൂമറേഷൻ ഫോം പൂരിപ്പിക്കുന്നതിനുള്ള സഹായവും ക്യാമ്പുകളിൽ ലഭ്യമാക്കി. ജില്ലയിൽ ഇതുവരെ 85% ൽ അധികം ഫോമുകൾ സ്വീകരിച്ചിട്ടുണ്ടെന്നും, അതിൽ 81% ഫോമുകളുടെ ഡിജിറ്റൈസേഷൻ പൂർത്തിയായിട്ടുണ്ടെന്നും കളക്ടർ പറഞ്ഞു. കൂടാതെ, പരിശോധനയിൽ 3.78% വോട്ടർമാർ മരണപ്പെട്ടവരായും, താമസം മാറിയവരായും, ഇരട്ടവോട്ടുള്ളവരായും കണ്ടെത്തിയിട്ടുണ്ട്. എന്യൂമറേഷൻ ഫോം സമർപ്പിക്കുന്ന എല്ലാ വോട്ടർമാരെയും ഉൾപ്പെടുത്തി 2025 ഡിസംബർ 16-ന് കരട് വോട്ടർപട്ടിക പ്രസിദ്ധീകരിക്കുമെന്ന് ജില്ലാ ഭരണകൂടം അറിയിച്ചു.
വോട്ടർവിവരങ്ങൾ കൃത്യമായി പുതുക്കുന്നതിനായി പ്രത്യേക ക്യാമ്പുകൾ വരും ദിവസങ്ങളിലും തുടരുമെന്ന് കളക്ടർ ഉറപ്പു നൽകി. എല്ലാ വോട്ടർമാരും എത്രയും പെട്ടെന്ന് എന്യൂമറേഷൻ ഫോം പൂരിപ്പിച്ച് അവരുടെ ബി.എൽ.ഒയെ സമീപിക്കണമെന്ന് ജില്ലാ കളക്ടർ അഭ്യർത്ഥിച്ചു.
