ന്യൂഡല്ഹി: രാഷ്ട്രപതിയുടെ നയപ്രഖ്യാപന പ്രസംഗവുമായി ബന്ധപ്പെട്ട് സോണിയ ഗാന്ധി നടത്തിയ ‘പാവം സ്ത്രീ’ എന്ന പരാമര്ശത്തില് അവകാശലംഘന നോട്ടീസ് നല്കി ബിജെപി. സോണിയയുടെ പരാമര്ശങ്ങള് രാജ്യത്തിന്റെ പരമോന്നത ഭരണഘടനാ സ്ഥാനത്തിനു നേരെയുള്ള അവമതിപ്പാണെന്നും ഇതിനെതിരെ ശക്തമായി പ്രതിഷേധിക്കുന്നുവെന്നും ബിജെപി അംഗങ്ങള് പറഞ്ഞു. ബജറ്റിന് മുന്നോടിയായുള്ള രാഷ്ട്രപതിയുടെ നയപ്രഖ്യാപന പ്രസംഗത്തെ കുറിച്ച് സോണിയ ഗാന്ധി നടത്തിയ പരാമര്ശം വിവാദമായിരുന്നു.
അനാദരവോടെ പെരുമാറിയെന്ന് ആരോപിച്ച് ബിജെപി നേതാക്കള് രംഗത്തെത്തിയിരുന്നു. വിഷയം ചര്ച്ചയായതോടെ സാണിയ ഗാന്ധിയുടെ പരാമര്ശത്തില് അതൃപ്തി പ്രകടിപ്പിച്ച് രാഷ്ട്രപതിഭവനും പ്രസ്താവനയിറക്കി. രാഷ്ട്രപതി ഭവന്റെ അന്തസ്സിനെ മുറിവേല്പ്പിക്കുന്ന വാക്കുകളാണ് കോണ്ഗ്രസ് നേതാവില് നിന്നുണ്ടായതെന്ന് രാഷ്ട്രപതിഭവന് പുറത്തിറക്കിയ പ്രസ്താവനയില് പറഞ്ഞു.
