ദില്ലി:ബലാത്സംഗത്തിന് ഇരയായ 14 കാരിയ്ക്ക ഗര്ഭഛിദ്രത്തിന് അനുമതി നല്കി സുപ്രീം കോടതി.30 ആഴ്ചത്തെ ദൈര്ഘ്യമുള്ള ഗര്ഭം അലസിപ്പിക്കാനാണ് കോടതിയുടെ അനുമതി.പ്രായപൂര്ത്തിയാവാത്ത പെണ്കുട്ടിക്ക് ബോംബെ ഹൈക്കോടതിയുടെ ഉത്തരവ് റദ്ദാക്കിക്കൊണ്ടാണ് ബലാത്സംഗത്തെ അതിജീവിച്ച് അനുകൂലമായി സുപ്രീംകോടതിയുടെ വിധി വന്നത്.ഇത് അസാധാരണമായ കേസാണെന്നായിരുന്നു കോടതിയുടെ പരാമര്ശം.
ഇന്ത്യന് നിയമപ്രകാരം 24 ആഴ്ച പിന്നിട്ടതിന് ശേഷം ഗര്ഭഛിദ്രം നടത്താന് കോടതിയുടെ അനുമതി ആവശ്യമാണ്.പെണ്കുട്ടിയുടെ മെഡിക്കല് റിപ്പോര്ട്ടിന്റെ അടിസ്ഥാനത്തിലാണ് ഗര്ഭച്ഛിദ്രത്തിന് സുപ്രീംകോടതി അനുമതി നല്കിയത്. ഈ ഘട്ടത്തില് ഗര്ഭഛിദ്രത്തിന് വിധേയമാകുമ്പോള് ചില അപകടസാധ്യതകള് ഉണ്ടെന്ന് ചീഫ് ജസ്റ്റിസ് ഡി വൈ ചന്ദ്രചൂഡിന്റെ നേതൃത്വത്തിലുള്ള ബെഞ്ച് നിരീക്ഷിച്ചു.പെണ്കുട്ടിയ്ക്ക് 14 വയസ് മാത്രമാണ് പ്രായമെന്നതിനാല് ഗര്ഭം അലസിപ്പിക്കാന് അനുവദിക്കുകയാണെന്നും ഇതൊരു ബലാത്സംഗക്കേസായതിനാല് അസാധാരണ കേസാണെന്നും ചീഫ് ജസ്റ്റിസ് പറഞ്ഞു.
ഏപ്രില് നാലിന് ബോംബെ ഹൈക്കോടതി ഗര്ഭച്ഛിദ്രത്തിന് അനുമതി നിഷേധിച്ചതിനെത്തുടര്ന്ന് കൗമാരക്കാരിയുടെ അമ്മ സുപ്രീം കോടതിയില് അപ്പീല് നല്കിയിരുന്നു.ലൈംഗികാതിക്രമവുമായി ബന്ധപ്പെട്ട് ഹൈക്കോടതി പരിഗണിച്ച മെഡിക്കല് റിപ്പോര്ട്ട് പെണ്കുട്ടിയുടെ ശാരീരികവും മാനസികവുമായ അവസ്ഥ വിലയിരുത്തുന്നതില് പരാജയപ്പെട്ടുവെന്ന് ചൂണ്ടിക്കാട്ടി മഹാരാഷ്ട്ര ആശുപത്രിയില് പുതിയ പരിശോധനയ്ക്ക് ഉത്തരവിടുകയും ചെയ്തിരുന്നു.ആശുപത്രിയിലെ മെഡിക്കല് ബോര്ഡ് ഗര്ഭച്ഛിദ്രത്തെ അനുകൂലിച്ചു കൊണ്ടായിരുന്നു റിപ്പോര്ട്ട് നല്കിയത്. അതിന്റെ അടിസ്ഥാനത്തില്, ഭരണഘടനയുടെ 142-ാം അനുച്ഛേദ പ്രകാരം കോടതി ഗര്ഭച്ഛിദ്രം അനുവദിക്കുകയായിരുന്നു.
