പാലക്കാട്: നെല്ലിയാമ്പതി മേഖലയിലെ പ്രശസ്തനായ കാട്ടാന ചില്ലിക്കൊമ്പൻ ചരിഞ്ഞു. പറമ്പികുളം വന്യജീവി സങ്കേതത്തിന് താഴെയുള്ള ആളിയാർ ഡാമിൽ നിന്ന് ഒഴുകുന്ന കനാലിൽ വീണാണ് ആന ചരിഞ്ഞതെന്നാണ് വിവരം. കനാൽ നീന്തിക്കടക്കുന്നതിനിടെ മുങ്ങിപ്പോയതാകാമെന്ന് സംശയിക്കുന്നു. ആനമല കടുവാ സംരക്ഷണ കേന്ദ്രത്തിന് കീഴിലുള്ള പൊള്ളാച്ചിക്കടുത്ത് ആളിയാർ കോണ്ടൂർ കനാലിന് സമീപത്തുനിന്നാണ് ചില്ലിക്കൊമ്പന്റെ ജഡം കണ്ടെത്തിയത്. തമിഴ്‌നാട് വനംവകുപ്പ് ഉദ്യോഗസ്ഥർ സ്ഥലത്തെത്തി പരിശോധന ആരംഭിച്ചിട്ടുണ്ട്. നെല്ലിയാമ്പതി മേഖലയിൽ വലിയ രീതിയിലുള്ള ഉപദ്രവങ്ങളില്ലാതെ ജീവിച്ചിരുന്ന ചില്ലിക്കൊമ്പൻ പ്രദേശവാസികൾക്ക് ഏറെ പരിചിതനും പ്രിയപ്പെട്ടവനുമായിരുന്നു.