ചെന്നൈ: തമിഴ്നാട്ടില് ഇന്ന് നിയമസഭാ സമ്മേളനം ആരംഭിക്കുന്നതിന് മുന്നോടിയായുള്ള ഗവര്ണറുടെ നയപ്രഖ്യാപന പ്രസംഗത്തിനിടെ അസാധാരണ രംഗങ്ങള്. രാവിലെ തമിഴ്നാട് നിയമസഭയിലെത്തിയ ഗവര്ണര് ആര്എന് രവി നയപ്രഖ്യാപന പ്രസംഗം നടത്താതെ ഇറങ്ങിപ്പോയി.
ഗവര്ണര് ഇറങ്ങിപ്പോയതോടെ പ്രസംഗം ഗവര്ണര് വായിച്ചതായി കണക്കാക്കണമെന്ന പ്രമേയം നിയമസഭ പാസാക്കി. അതിനിടെ ഇറങ്ങിപ്പോയ ഗവര്ണര് സര്ക്കാരിനെതിരെ കുറ്റപത്രവുമായി വാര്ത്താക്കുറിപ്പ് പുറത്തിറക്കി. നിയമസഭയില് നടപടി ആരംഭിക്കുന്നതിന് മുന്നോടിയായി ദേശീയ ഗാനം ആലപിച്ചില്ലെന്നതടക്കം പ്രസംഗം വായിക്കാതിരുന്നതിന് 13 കാരണങ്ങള് ചൂണ്ടികാട്ടിയാണ് ഗവര്ണറുടെ വാര്ത്താക്കുറിപ്പ്.
