കൊച്ചി: വേടനെതിരായ പുലിപ്പല്ല് കേസില് നിയമനടപടികളുമായി മുന്നോട്ടുപോകുമെന്ന് വനംമന്ത്രി എ കെ ശശീന്ദ്രന്. പുലിപ്പല്ല് ആരാധകന് നല്കിയതാണോ എന്ന് കോടതിയില് തെളിയിക്കണമെന്ന് ഇതുമായി ബന്ധപ്പെട്ട ചോദ്യത്തിന് ശശീന്ദ്രന് മാധ്യമങ്ങളോട് പറഞ്ഞു. വേടനെതിരെ (ഹിരണ് ദാസ് മുരളി) ഏഴ് വര്ഷം വരെ തടവ് ലഭിക്കാവുന്ന കുറ്റങ്ങള് ചുമത്തിയിട്ടുണ്ടെന്നും മന്ത്രി വ്യക്തമാക്കി.
ലഹരിയുമായി ബന്ധപ്പെട്ട് എക്സൈസ് ഡിപ്പാര്ട്ട്മെന്റ് നടത്തുന്ന റെയ്ഡിനിടെയാണ് വേടന് ഉള്പ്പെടയുള്ളവരെ കസ്റ്റഡിയിലെടുത്തത്. വേടന്റെ കൈയിൽ ഉണ്ടായിരുന്ന ചെയിനില് പുലിപ്പല്ല് ഉള്ളക്കാര്യം പോലീസാണ് ഫോറസ്റ്റ് ഉദ്യോഗസ്ഥരെ അറിയിച്ചത്. തുടർന്ന് വേടനെ ഫോറസ്ററ് ഉദ്യോഗസ്ഥർ ചോദ്യം ചെയ്യുകയാണ്. ഉടൻ തന്നെ അന്വേഷണം പൂര്ത്തിയാക്കി റിപ്പോർട്ട് കോടതിയില് സമര്പ്പിക്കും. ശിക്ഷാനടപടികള് ഉള്പ്പെടെയുള്ള കാര്യങ്ങള് തീരുമാനിക്കുന്നത് കോടതിയാണ്. പുലിപ്പല്ല് ആരാധകന് നല്കിയതാണോ എന്ന് വേടന് കോടതിയില് തെളിയിക്കണമെന്നും മന്ത്രി വ്യക്തമാക്കി.
നേരത്തെ തന്നെ വേടന് ഫോറസ്റ്റ് വിജിലന്സിന്റെ നിരീക്ഷണത്തിലായിരുന്നുവെന്നും മന്ത്രി അറിയിച്ചു. വനം വകുപ്പിന്റെ വിജിലന്സ് സ്ക്വാഡ് നടത്തിയ പരിശോധനയിലാണ് മാലയിലേത് യഥാര്ഥ പുലിപ്പല്ലാണെന്ന നിഗമനത്തില് എത്തിച്ചേര്ന്നത്. പുലിപ്പല്ല് കൈമാറിയത് രഞ്ജിത്ത് എന്നയാളാണെന്നും ചെന്നൈയില്വച്ചാണ് കൈമാറിയതെന്നുമാണ് വേടന്റെ മൊഴി. ഇയാള് മലേഷ്യയില് സ്ഥിരതാമസക്കാരനാണെന്നും മൊഴിയിലുണ്ട്. രഞ്ജിത്ത് എന്നയാളെ കേന്ദ്രീകരിച്ചുള്ള അന്വേഷണം ആരംഭിച്ചു.
