തൃശൂർ: തദ്ദേശ തിരഞ്ഞെടുപ്പ് ‘ഹരിത തദ്ദേശ തിരഞ്ഞെടുപ്പ് 2025’ എന്ന പേരിൽ ആചരിക്കുന്നതിനോടനുബന്ധിച്ച് കന്നി വോട്ടർമാർക്ക് ഒരു പ്രത്യേക സമ്മാനവുമായി ഗുരുവായൂർ നഗരസഭ അധികൃതർ.
വോട്ടവകാശം ആദ്യമായി വിനിയോഗിക്കുന്ന ഗുരുവായൂർ ഗവ:യു.പി സ്കൂളിൽ എത്തിയ കന്നി വോട്ടർമാർക്ക് ഒരു വൃക്ഷതൈ നൽകി അവരെ സ്വാഗതം ചെയ്യുകയായിരുന്നു ഗുരുവായൂർ നഗരസഭ. പരിസ്ഥിതി സൗഹൃദ മുന്നേറ്റങ്ങളെ പ്രോത്സാഹിപ്പിക്കുന്ന പദ്ധതിയുടെ ഭാഗമായിട്ടാണ് ഈ നീക്കം.
അതോടൊപ്പം, ‘ശുചിത്വ നഗരം ശുദ്ധിയുള്ള ഗുരുവായൂർ’ എന്ന പദ്ധതിയുടെ ഭാഗമായി, എല്ലാ ബൂത്തുകളിലും ഓലകൊണ്ട് നിർമിച്ച മാലിന്യ കൂടകൾ ഒരുക്കിയിരുന്നു. പ്ലാസ്റ്റിക് ഒഴിവാക്കാനും, ശുചിത്വ ബോധവൽക്കരണവും ശക്തമാക്കുന്നതിനുമുള്ള നഗരസഭയുടെ ശ്രമമാണിതെന്ന് അധികൃതർ അറിയിച്ചു.
