കൽപ്പറ്റ: വയനാട്ടിൽ ആദിവാസി വിഭാഗത്തിലുള്ള വിദ്യാര്ത്ഥികളോട് കൊടുംക്രൂരത. മാനന്തവാടി തിരുനെല്ലിയിലെ റെസിഡൻഷ്യൽ സ്കൂളിൽ 127 പെൺകുട്ടികൾക്ക് ക്ലാസ് മുറികളിലാണ് താമസ സൗകര്യം ഒരുക്കിയിരിക്കുന്നത്. മൂന്നു ക്ലാസ് മുറികളിലായാണ് ഇവരെ പാർപ്പിച്ചിരിക്കുന്നത്, എന്നാൽ ഇവർക്കായി ഒരു ശുചിമുറി മാത്രമേ ലഭ്യമുള്ളൂ.
അപകടാവസ്ഥയിലായ ഹോസ്റ്റൽ കെട്ടിടം ഉപേക്ഷിച്ചതിനെ തുടർന്ന് വിദ്യാർത്ഥികളെ താൽക്കാലികമായി ക്ലാസ് മുറികളിലേക്ക് മാറ്റിയതാണ്. എന്നാൽ, സുരക്ഷാ സൗകര്യങ്ങളും ശുചിത്വ സൗകര്യങ്ങളും ഇല്ലാത്ത അന്തരീക്ഷത്തിൽ വിദ്യാർത്ഥികൾ വലിയ അസൗകര്യങ്ങൾ അനുഭവിക്കുകയാണ്. പൊതു നിർമ്മാണ വകുപ്പ് അപകടാവസ്ഥയിലാണെന്ന് സ്ഥിരീകരിച്ച കെട്ടിടത്തിന് സമീപത്താണ് സ്കൂളിലെ 257 വിദ്യാർത്ഥികളും ഇപ്പോഴും പഠനം തുടരുന്നത്.
ജൂലൈയിൽ സ്കൂൾ കണ്ണൂർ ആറളത്തേക്ക് മാറ്റാൻ സർക്കാർ തീരുമാനിച്ചിരുന്നുവെങ്കിലും നടപടി ഇതുവരെ പൂർത്തിയായിട്ടില്ല. ആറളത്തിലെ പുതിയ കെട്ടിടത്തിൽ വൈദ്യുതി ലഭ്യമല്ലെന്നതാണ് താമസം നീളാനുള്ള കാരണം എന്ന് അധികൃതർ വിശദീകരിക്കുന്നത്. മൂന്നു ക്ലാസ് മുറികളിലാണ് ഇപ്പോൾ എല്ലാ വിദ്യാർത്ഥികളെയും പാർപ്പിച്ചിരിക്കുന്നതെന്ന് സ്കൂൾ അധികൃതർ സ്ഥിരീകരിച്ചു. ജൂലൈയിൽ തന്നെ മാറ്റത്തിന് തീരുമാനം എടുത്തിരുന്നുവെന്ന് റെസിഡൻഷ്യൽ സ്കൂളിലെ സീനിയർ സൂപ്രണ്ട് ജയൻ നാലുപുരക്കൽ വ്യക്തമാക്കി.
