വാഷിങ്ടൺ: പശ്ചിമേഷ്യയിലെ സംഘർഷം അവസാനിപ്പിക്കാൻ ഇറാനെ മുന്നിൽവെച്ച് അമേരിക്ക പതിനഞ്ച് നിർദേശങ്ങൾ അവതരിപ്പിച്ചു. ഇറാന്റെ ആണവപദ്ധതിയിൽ കർശന നിയന്ത്രണം ഏർപ്പെടുത്തുക, ഹോർമുസ് കടലിടുക്ക് വീണ്ടും തുറക്കുക തുടങ്ങിയ ആവശ്യങ്ങളാണ് പ്രധാനമായി മുന്നോട്ടുവെച്ചിരിക്കുന്നത്.
ചർച്ചകൾക്ക് വഴി തെളിയിക്കുന്നതിനായി ഒരുമാസം നീളുന്ന വെടിനിർത്തലിനും യുഎസ് താത്പര്യം പ്രകടിപ്പിച്ചിട്ടുണ്ട്. എന്നാൽ, ഈ നിർദേശങ്ങളോട് ഇറാൻ അനുകൂലമായി പ്രതികരിക്കാനുള്ള സാധ്യത കുറവാണെന്നാണ് നയതന്ത്രവൃത്തങ്ങളുടെ വിലയിരുത്തൽ.
ഇറാന്റെ ആണവ ശേഷിയും ബന്ധപ്പെട്ട സൈനിക സംവിധാനങ്ങളും നിയന്ത്രണവിധേയമാക്കണമെന്നതാണ് യുഎസിന്റെ മറ്റൊരു പ്രധാന ആവശ്യം. ഇതിനുപകരമായി ഇറാനുമേൽ ഏർപ്പെടുത്തിയിരിക്കുന്ന ഉപരോധങ്ങൾ ഭാഗികമായി പിൻവലിക്കാമെന്നും അമേരിക്ക സൂചിപ്പിക്കുന്നു.
അതോടൊപ്പം, യുഎന്നിന്റെ മേൽനോട്ടത്തിലുള്ള സിവിലിയൻ ആണവപദ്ധതി, സാമ്പത്തിക സഹായം എന്നിവയിലൂടെ ഇറാന്റെ സമ്പദ്വ്യവസ്ഥയെ ശക്തിപ്പെടുത്താനുള്ള വാഗ്ദാനങ്ങളും മുന്നോട്ടുവെച്ചിട്ടുണ്ട്.
അതേസമയം, യുഎസിന്റെ ഈ നീക്കത്തിന് ഇസ്രയേൽ അനുകൂലമല്ലെന്ന റിപ്പോർട്ടുകളുണ്ട്. യുദ്ധം തുടരണമെന്ന നിലപാടിലാണ് ഇസ്രയേൽ തുടരുന്നത്. വെടിനിർത്തൽ നിർദേശത്തിൽ അവർ അതിശയിച്ചതായും അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.
ഫെബ്രുവരി 28ന് ആരംഭിച്ച സംഘർഷം നാലാഴ്ച പിന്നിട്ടിട്ടും ശമനമില്ലാതെ തുടരുകയാണ്. പാകിസ്താന്റെ മധ്യസ്ഥതയിലൂടെയാണ് യുഎസിന്റെ നിർദേശങ്ങൾ ഇറാനെ സമീപിച്ചതെന്നാണ് സൂചന. മുമ്പ് നടന്ന യുഎസ്-ഇറാൻ ആണവചർച്ചകളിലെ നിർദേശങ്ങളെ അടിസ്ഥാനമാക്കിയുള്ളതാണിത് എന്നും വിദഗ്ധർ വിലയിരുത്തുന്നു.
