കാലിഫോർണിയ: ജനപ്രിയ മെസേജിംഗ് ആപ്പ് വാട്സ്ആപ്പ് ഉടൻ തന്നെ ഒരു പ്രീമിയം സബ്സ്ക്രിപ്ഷൻ പദ്ധതി അവതരിപ്പിക്കാൻ ഒരുങ്ങുകയാണ്. പുതിയ സേവനം ഉപയോക്താക്കൾക്ക് കൂടുതൽ കസ്റ്റമൈസേഷൻ സൗകര്യങ്ങളും അധിക ഫീച്ചറുകളും നൽകുന്ന തരത്തിലാകും. സാധാരണ ഉപയോഗത്തിന് ആപ്പ് സൗജന്യമായി തുടരുമെങ്കിലും, കൂടുതൽ സവിശേഷതകൾ ആഗ്രഹിക്കുന്നവർക്ക് പ്രീമിയം പ്ലാനിലേക്ക് സബ്സ്ക്രൈബ് ചെയ്യാനുള്ള അവസരം ലഭിക്കും.
റിപ്പോർട്ടുകൾ പ്രകാരം, ഈ പുതിയ പതിപ്പിന് വാട്സ്ആപ്പ് പ്ലസ് എന്ന പേര് നൽകാനുള്ള സാധ്യതയുണ്ട്. നിലവിലെ പതിപ്പിനെ അപേക്ഷിച്ച് കൂടുതൽ പ്രത്യേക ഫീച്ചറുകളും കസ്റ്റമൈസേഷൻ ഓപ്ഷനുകളും ഈ പതിപ്പിൽ ലഭിക്കും. പ്രത്യേകിച്ച് കൂടുതൽ സമയം ആപ്പ് ഉപയോഗിക്കുന്ന ഉപയോക്താക്കൾക്ക് പ്രീമിയം സേവനം കൂടുതൽ പ്രയോജനപ്രദമാകുമെന്ന് വിലയിരുത്തപ്പെടുന്നു.
പ്രീമിയം പ്ലാനിലെ പ്രധാന സവിശേഷതകളിൽ ഒന്ന് ആപ്പിന്റെ രൂപഭാവം ഇഷ്ടാനുസരണം മാറ്റാൻ കഴിയുന്നതാണ്. ഉപയോക്താക്കൾക്ക് പുതിയ ഐക്കണുകൾ, നിറങ്ങൾ, തീമുകൾ എന്നിവ തിരഞ്ഞെടുക്കാൻ സാധിക്കും. ചെറിയ മാറ്റങ്ങളായിരിക്ക വ്യക്തിപരമായ അനുഭവം നൽകുന്ന കസ്റ്റമൈസേഷൻ ഫീച്ചറുകൾക്ക് ഇന്നത്തെ ഡിജിറ്റൽ ലോകത്ത് വലിയ ആവശ്യകതയുണ്ട്. കൂടാതെ, പ്രീമിയം ഉപയോക്താക്കൾക്ക് പ്രത്യേക സ്റ്റിക്കറുകൾ, വ്യത്യസ്ത നോട്ടിഫിക്കേഷൻ ശബ്ദങ്ങൾ, ചാറ്റുകളിൽ കൂടുതൽ പ്രകടമായ റിയാക്ഷനുകൾ തുടങ്ങിയ സവിശേഷതകളും ലഭിക്കുമെന്ന് റിപ്പോർട്ടുകൾ പറയുന്നു. ഇതിലൂടെ ചാറ്റിംഗ് അനുഭവം കൂടുതൽ ആകർഷകവും വ്യക്തിപരവുമായിരിക്കുമെന്ന് വാട്സ്ആപ്പ് പ്രതീക്ഷിക്കുന്നു.
