പത്തൊമ്പതാം നൂറ്റാണ്ട്’ നായിക കയാദു ലോഹര് ഇഡി നിരീക്ഷണത്തില്. തമിഴ്നാട്ടിലെ സര്ക്കാറിന്റെ മദ്യവില്പന കമ്പനിയായ ടാസ്മാക്കുമായി ബന്ധപ്പെട്ട സാമ്പത്തിക അഴിമതിക്കേസിലെ ഇഡി അന്വേഷണത്തില് കയാദു ലോഹറിന്റെ പേരും ഉള്പ്പെടുന്നു എന്ന റിപ്പോര്ട്ടുകളാണ് പുറത്തുവരുന്നത്. ടാസ്മാക് കേസില് ഇഡി റെയ്ഡില് പിടിക്കപ്പെട്ട വ്യക്തികള് നടിയുടെ പേര് വെളിപ്പെടുത്തിയതായാണ് റിപ്പോര്ട്ട്. കുറ്റാരോപിതര് നടത്തിയ നൈറ്റ് പാര്ട്ടിയില് പങ്കെടുക്കാന് കയാദു 35 ലക്ഷം രൂപ വാങ്ങിയതായും ആരോപണമുണ്ട്. അഴിമതിയുമായി ബന്ധപ്പെട്ട് നടിക്ക് എന്തെങ്കിലും ബന്ധമുണ്ടോ എന്ന് അറിയാന് അന്വേഷണം ആരംഭിച്ചതായാണ് റിപ്പോര്ട്ടുകള്. തമിഴ്നാടിലെ സര്ക്കാര് നിയന്ത്രണത്തിലുള്ള മദ്യ വില്പ്പന കമ്പനിയായ ടാസ്മാക്കുമായി (തമിഴ്നാട് സ്റ്റേറ്റ് മാർക്കറ്റിങ് കോർപ്പറേഷൻ) ബന്ധപ്പെട്ട സാമ്പത്തിക അഴിമതിയാണ് ടാസ്മാക് അഴിമതി എന്ന പേരില് അറിയിപ്പെടുന്നത്.
2021ല് ‘മുഗില്പേട്ടെ’ എന്ന കന്നഡ സിനിമയിലൂടെ അഭിനയരംഗത്തേക്ക് എത്തിയ നടിയാണ് കയാദു. 2022ല് ‘പത്തൊമ്പതാം നൂറ്റാണ്ടി’ല് അഭിനയിച്ചതോടെ ശ്രദ്ധിക്കപ്പെട്ടു. പിന്നീട് ‘അല്ലുരി’ എന്ന തെലുങ്ക് സിനിമയിലും അഭിനയിച്ചു. 2023ല് ‘ഐ പ്രേം യു’ എന്ന സിനിമയില് വേഷമിട്ടു.
വീണ്ടും മലയാളത്തില് ‘ഒരു ജാതി ജാതകം’ എന്ന സിനിമയില് അഭിനയിച്ചു. ഈ വര്ഷം പുറത്തിറങ്ങിയ ‘ഡ്രാഗണ്’ എന്ന തമിഴ് ചിത്രത്തിലൂടെയാണ് നടി ഏറെ പ്രശസ്തി നേടുന്നത്. അടുത്ത നാഷ്നല് ക്രഷ് എന്ന വിശേഷണവും നടി നേടിയിരുന്നു. ‘ഇദയം മുരളി’, ‘ഇമ്മോര്ട്ടല്’ എന്നീ തമിഴ് ചിത്രങ്ങളിലും സിമ്പുവിന്റെ പുതിയ സിനിമയിലും കയാദു ആണ് നായിക. നിലവിൽ 2 കോടി രൂപയാണ് നടിയുടെ പ്രതിഫലം.
