തിരുവനന്തപുരം: കോണ്ഗ്രസ് നേതാക്കള്ക്കെതിരെ കടുത്ത വിമര്ശനവുമായി പാർട്ടി മുഖപത്രമായ വീക്ഷണത്തിൽ മുഖപ്രസംഗം. കോഴിക്കോട് ഡിസിസി ഉദ്ഘാടന ചടങ്ങിൽ നടന്നത് നിലയ്ക്കും വിലയ്ക്കും ചേരാത്ത പ്രവൃത്തിയാണെന്നും പ്രസ്ഥാനത്തിന്റെ യശസിനെ ഇടിച്ചുകയറിയും പിടിച്ചുതള്ളിയും അപകീര്ത്തിപ്പെടുത്തരുതെന്നുമാണ് മുഖപ്രസംഗത്തിൽ പറയുന്നത്.
പാര്ട്ടി പരിപാടികളില് പ്രോട്ടോക്കോള് പാലിക്കുവാന് എല്ലാവരും തയ്യാറാവണമെന്നും വീക്ഷണം പറയുന്നു. ജനക്കൂട്ട പാര്ട്ടിയെന്നത് ജനാധിപത്യപരമായ വിശാലതയാണ്. കുത്തഴിഞ്ഞ അവസ്ഥയാകരുത്.മാതൃക കാണിക്കുവാന് ബൂത്ത് മുതല് കെപിസിസി വരെയുള്ള ഭാരവാഹികള്ക്ക് കഴിയണം. ക്യാമറയിൽ മുഖം വരുത്താന് ഉന്തും തള്ളുമുണ്ടാക്കുമ്പോൾ പാര്ട്ടിക്ക് ഉണ്ടാക്കുന്ന അവമതിപ്പ് സ്വയം തിരിച്ചറിയണമെന്നും അഴിമതി സര്ക്കാരിനെ പുറത്താക്കാൻ കാത്തുനില്ക്കുമ്പോള് ജനങ്ങളുടെ മനസ് മടുപ്പിക്കരുതെന്നും മുഖപ്രസംഗത്തിൽ പറയുന്നു.
