മലപ്പുറം: നിലമ്പൂർ ഉപതിരഞ്ഞെടുപ്പ് ഉടൻ നടത്തണമെന്നാവശ്യപ്പെട്ട് പി വി അൻവർ കേന്ദ്ര തിരഞ്ഞെടുപ്പ് കമ്മീഷന് കത്ത് നൽകി. ഉപതിരഞ്ഞെടുപ്പ് എത്രയും വേഗത്തിൽ നടത്തണമെന്ന് ആവശ്യമുന്നയിച്ചാണ് അൻവറിൻ്റെ കത്ത്. ഇനിയും വൈകിയാൽ നിയമ നടപടിയുമായി ഹൈക്കോടതിയെ സമീപിക്കുമെന്നും അൻവർ പറഞ്ഞു.
അതേസമയം, നിലമ്പൂര് ഉപതിരഞ്ഞെടുപ്പ് നടക്കുന്നതിന് മുന്നോടിയായി തൃണമൂല് കോണ്ഗ്രസിനെ യുഡിഎഫിലെ അസോസിയേറ്റ് പാര്ട്ടിയാക്കാന് ആലോചനയുണ്ട്. ഹൈക്കമാന്ഡ് അനുമതി ലഭിച്ചാല് പ്രഖ്യാപനമുണ്ടാകും. തൃണമൂല് കോണ്ഗ്രസിനെ മുന്നണിയില് ഉള്പ്പെടുത്തുന്നത് പിന്നീട് തീരുമാനിക്കുമെന്നാണ് സൂചന. ഘടകകക്ഷിയായി പരിഗണിക്കാതെ സഹകക്ഷിയായി പരിഗണിക്കുന്ന രീതിയാണ് അസോസിയേറ്റ് പാര്ട്ടിയെന്നത്. അസോസിയേറ്റ് പാര്ട്ടി മുന്നണിക്കകത്ത് നില്ക്കുന്ന പാര്ട്ടിയായിരിക്കില്ല. ഇക്കാര്യത്തില് വ്യക്തത വരുത്താനാണ് കഴിഞ്ഞ ദിവസം ചേര്ന്ന യോഗത്തില് പ്രതിപക്ഷ നേതാവ് വി ഡി സതീശനെ ചുമതലപ്പെടുത്തിയത്.
