കൊച്ചി: ക്ഷേത്രങ്ങളിലെ ഉത്സവാഘോഷങ്ങളിലും മറ്റ് പരിപാടികളിലും ആന ഇടഞ്ഞുണ്ടാകുന്ന ആക്രമണങ്ങളില് ഉത്തരവാദിത്വം ഉടമസ്ഥനും പാപ്പാന്മാര്ക്കുമായിരിക്കുമെന്ന് ഹൈക്കോടതി. കുറ്റിക്കാട്ട് ക്ഷേത്രത്തിലെ ഘോഷയാത്രയില് ‘ബാസ്റ്റിന് വിനയശങ്കര്’ എന്ന ആനയുടെ ആക്രമണത്തില് പരിക്കേറ്റ് ചികിത്സയിലിരിക്കെ മരിച്ച വിന്സെന്റിന്റെ കുടുംബാംഗങ്ങള് നല്കിയ ഹര്ജി പരിഗണിക്കുകയായിരുന്നു കോടതി.
2008 ഏപ്രില് 24ന് കുറ്റിക്കാട്ട് ക്ഷേത്രത്തിലെ പരിപാടിക്കിടെയാണ് അപകടം. വിന്സന്റ് ആനയുടെ പുറത്ത് കയറി സഞ്ചരിക്കവേ മൂലവട്ടം റെയില്വേ ക്രോസിങ്ങിലെത്തിയപ്പോള് ആന പെട്ടെന്ന് അക്രമകാരിയാകുകയായിരുന്നു. തുടർന്ന് പാപ്പാന്മാര് ആനയെ നിയന്ത്രിക്കാതെ ഓടി രക്ഷപ്പെട്ടു. വിന്സെന്റിനെ ആന ചവിട്ടി കൊല്ലുകയായിരുന്നു. ആക്രമണത്തില് നട്ടെല്ലിനും ഇടുപ്പിനും ഗുരുതരമായ പരിക്കേറ്റ വിന്സെന്റ് മാസങ്ങളോളം ആശുപത്രിയിലായിരുന്നു. 2009 ജൂലൈയില് മരിച്ചു.
സംഭവത്തില് ആനയുടെ ഉടമ, പാപ്പാന്മാര്, ക്ഷേത്ര മാനേജ്മെന്റ് എന്നിവരെ പ്രതികളാക്കി വിന്സെന്റിന്റെ കുടുംബം 33,72,000 രൂപ നഷ്ടപരിഹാരം ആവശ്യപ്പെട്ട് ഹര്ജി നല്കുകയായിരുന്നു. കേസില് 10,93,000 രൂപ നഷ്ടപരിഹാരം നല്കാനാണ് കോടതി ഉത്തരവിട്ടിരിക്കുന്നത്.
