കോഴിക്കോട്: മലാപറമ്പ് സെക്സ് റാക്കറ്റ് കേസില് പ്രതികളായ രണ്ടു പൊലിസുകാര് കസ്റ്റഡിയില്. പൊലിസ് ഡ്രൈവര്മാരായ ഷൈജിത്ത്, സനിത്ത് എന്നിവരാണ് കസ്റ്റഡിയിലുള്ളത്.
താമരശേരികോരങ്ങാട് നിന്നാണ് ഇവര് പിടിയിലായത്. പുതിയ ഒളിസങ്കേതം തേടി പോകുന്നതിനിടെയാണ് ഇവര് പൊലീസ് വലയില് കുടുങ്ങിയത്. സംഭവം വിവാദമായതോടെ സര്വീസില് നിന്ന് ഇരുവരെയും സസ്പെന്ഡ് ചെയ്തിരുന്നു. ഇതിന് പിന്നാലെ ഇവര് ഒളിവില് പോയിരുന്നു.ഷൈജിത്തിന്റെ പാസ്പോര്ട്ട് കണ്ടുകെട്ടിയിരുന്നു. ഇവര്ക്കായി വലിയ രീതിയില് അന്വേഷണം നടന്നുകൊണ്ടിരിക്കെയാണ് പിടിയിലായത്. വാഹനം ഉള്പ്പെടെയാണ് കസ്റ്റഡിയിലെടുത്തത്.കേസിലെ മറ്റൊരു പ്രതിയായ അമനീഷ് കുമാര് വിദേശത്താണ്. അമനീഷ് കുമാറാണ് ഈ കെട്ടിടം വാടകയ്ക്ക് വാങ്ങിയത്. ഇയാളെ നാട്ടിലെത്തിക്കാനുള്ള നീക്കം അന്വേഷണ സംഘം തുടങ്ങി.
വിദേശത്തുള്ള അമനീഷുമായി വലിയ രീതിയില് പൊലീസുകാര് സാമ്പത്തിക ഇടപാടുകള് നടത്തിയതായി അന്വേഷണത്തില് വ്യക്തമായിരുന്നു. സെക്സ് റാക്കറ്റ് കേന്ദ്രം പ്രവര്ത്തിച്ചത് ഇവരുടെ സഹായത്തോടെയാണ്. സാമ്പത്തിക ഇടപാടുമായി ബന്ധപ്പെട്ട കൂടുതല് കാര്യങ്ങള് വ്യക്തമാകാന് ഇവരെ പിടികൂടേണ്ടത് പ്രധാനമായിരുന്നു. നടത്തിപ്പുകാരായ മൂന്നു പേര് ഉള്പ്പടെ ഒമ്പത് പേരെയായിരുന്നു ഈ സെക്സ് റാക്കറ്റ് കേന്ദ്രത്തിലെ പരിശോധനയില് പിടികൂടിയത്.
