മലപ്പുറം: കാലിക്കറ്റ് സര്വകലാശാല ബിഎ മൂന്നാം സെമസ്റ്റര് പാഠ്യപദ്ധതിയില്നിന്ന് റാപ്പര് വേടന്റെ പാട്ടും ഗായിക ഗൗരിലക്ഷ്മിയുടെ കഥകളി സംഗീതവും നീക്കില്ല. യുജി മലയാളം പഠനബോര്ഡ് അധ്യക്ഷന് ഡോ. എം.എസ്. അജിത് കുമാറാണ് ഇക്കാര്യം മാധ്യമങ്ങളെ
അറിയിച്ചത്.
വൈസ് ചാന്സലര് നിയോഗിച്ചതനുസരിച്ച് വിഷയം പരിശോധിച്ച മുന് മലയാളവിഭാഗം മേധാവി ഡോ. എം.എം. ബഷീര്, വേടന്റെ ‘ഭൂമി ഞാന് വാഴുന്നിട’വും ഗൗരിലക്ഷ്മിയുടെ കഥകളിസംഗീതവും പാഠപദ്ധതിയില്നിന്ന് നീക്കണമെന്ന് ശുപാര്ശ ചെയ്തിരുന്നു. ആ ശുപാര്ശ തള്ളിയാണ് പഠനബോര്ഡ് തീരുമാനമെടുത്തത്.
പാഠപുസ്തകത്തില് വേടന്റെയും ഗൗരിയുടെയും രചനകള് ഉള്പ്പെടുത്തരുതെന്നാവശ്യപ്പെട്ട് അഞ്ച് പരാതികള് സര്വകലാശാലയ്ക്ക് കിട്ടിയിരുന്നു. തുടര്ന്നാണ് വിസി വിദഗ്ധസമിതിയെ നിയോഗിച്ചത്. വിഷയത്തില് അന്തിമ തീരുമാനം എടുക്കേണ്ടത് മലയാളം യുജി പഠനബോര്ഡാണ്. ഇപ്പോള് പാഠഭാഗങ്ങള് നീക്കില്ലെന്ന് ബോര്ഡ് അധ്യക്ഷന് വ്യക്തമാക്കി. ഡോ. എം.എം. ബഷീറിന്റെ റിപ്പോര്ട്ടിന് നിയമസാധുതയില്ലെന്നും അദ്ദേഹം പറഞ്ഞു.
