മനം കവരുന്ന അഭിനയ മുഹൂര്ത്തങ്ങളുമായി അര്ജുന് അശോകന് ചിത്രം ‘തലവര’ തിയേറ്ററുകളില് മികച്ച പ്രേക്ഷക പ്രതികരണം നേടി മുന്നേറിക്കൊണ്ടിരിക്കുകയാണ്. കരിയറില് തന്നെ ഏറെ വെല്ലുവിളി നിറഞ്ഞ വേഷം അതിഗംഭീരമായി അര്ജുന് സ്ക്രീനില് പകര്ന്നാടിയിട്ടുണ്ട് എന്നാണ് പ്രേക്ഷകരുടെ ഭാഷ്യം. ഇപ്പോഴിതാ ചിത്രം കണ്ട ശേഷം അര്ജുന്റെ അച്ഛന് ഹരിശ്രീ അശോകന് പറഞ്ഞ വാക്കുകള് സോഷ്യല് മീഡിയയില് ശ്രദ്ധ നേടിയിരിക്കുകയാണ്.
”സൂപ്പര്… അടിപൊളിയാണ് ഗംഭീരമായിട്ടുണ്ട്. ഇത് വെറുതെ മോനായതുകൊണ്ട് പറയുകയല്ല. എല്ലാ ആര്ട്ടിസ്റ്റുകളും ഗംഭീരമാണ്. എല്ലാവരും നന്നായി പെര്ഫോം ചെയ്തിട്ടുണ്ട്. നല്ല ഡയറക്ഷന്, എനിക്ക് തോന്നുന്നു ഈ അടുത്തകാലത്തൊന്നും ഇങ്ങനെയൊരു സിനിമ വന്നിട്ടില്ല. ഒരു ഫ്രെയിം പോലും ബൊറടിക്കുന്നില്ല, എല്ലാ സീനുകളും ഗംഭീരമായിട്ടുണ്ട്. നല്ല എഡിറ്റിംഗും സ്ക്രിപ്റ്റിംഗുമാണ്. യൂത്തിനും ഫാമിലിക്കും നന്നായി ക്യാച്ച് ചെയ്യാനാകും വിധം രസകരമായി ഒരുക്കിയിട്ടുണ്ട്”, ഹരിശ്രീ അശോകന്റെ വാക്കുകള്.
മലയാളത്തിലെ ഒട്ടേറെ ഹിറ്റ് സിനിമകളുടെ അമരക്കാര് മഹേഷ് നാരായണനും ഷെബിന് ബക്കറും ചേര്ന്ന് നിര്മ്മിച്ചിരിക്കുന്ന ‘തലവര’ അഖില് അനില്കുമാറാണ് സംവിധാനം ചെയ്തിരിക്കുന്നത്. തികഞ്ഞ കൈയ്യടക്കത്തോടെ ഉള്ളില് തട്ടും വിധമാണ് ചിത്രം അണിയിച്ചൊരുക്കിയിരിക്കുന്നത് എന്നാണ് തിയേറ്ററില് നിന്ന് ലഭിക്കുന്ന റിപ്പോര്ട്ടുകള്. ചിത്രത്തില് ‘പാണ്ട’ എന്ന കഥാപാത്രമായി അര്ജുന് അശോകനെത്തിയപ്പോള് ജ്യോതി എന്ന നായിക കഥാപാത്രമായാണ് രേവതി ശര്മ്മ എത്തിയിരിക്കുന്നത്. അശോകന്, ഷൈജു ശ്രീധര്, അശ്വത് ലാല്, പ്രശാന്ത് മുരളി, അഭിറാം രാധാകൃഷ്ണന്, ദേവദര്ശിനി, അമിത് മോഹന് രാജേശ്വരി, സാം മോഹന്, മനോജ് മോസസ്, സോഹന് സീനുലാല്, മുഹമ്മദ് റാഫി, വിഷ്ണു രെഘു, ശരത് സഭ, ഷെബിന് ബെന്സണ്, ആതിര മറിയം, വിഷ്ണുദാസ്, ഹരീഷ് കുമാര്, സുമ തുടങ്ങി നിരവധി താരങ്ങളാണ് ചിത്രത്തില് ഒരുമിച്ചിരിക്കുന്നത്.
പാലക്കാടിന്റെ തനത് സംസാരശൈലിയുമായി എത്തിയിരിക്കുന്ന ചിത്രത്തില് മലയാളത്തിലെ യുവതാരനിരയില് ശ്രദ്ധേയനായ അര്ജുന് അശോകന് ഇതുവരെ അവതരിപ്പിക്കാത്ത രീതിയിലുള്ളൊരു ഗെറ്റപ്പിലാണുള്ളത് എന്നതാണ് പ്രത്യേകത. ഷെബിന് ബെക്കര് പ്രൊഡക്ഷന്സിന്റേയും മൂവിംഗ് നരേറ്റീവ്സിന്റേയും ബാനറില് ഷെബിന് ബെക്കറും മഹേഷ് നാരായണനും ചേര്ന്ന് നിര്മ്മിച്ചിരിക്കുന്നതാണ് ചിത്രം. ടേക്ക് ഓഫ്, സീ യു സൂണ്, മാലിക്ക്, അറിയിപ്പ് തുടങ്ങിയ ശ്രദ്ധേയ സിനിമകളുടെ സംവിധായകനായ മഹേഷ് നാരായണനും ചാര്ലി, ടേക്ക് ഓഫ്, തണ്ണീര്മത്തന് ദിനങ്ങള്, സൂപ്പര് ശരണ്യ, അറിയിപ്പ് തുടങ്ങിയ പ്രേക്ഷക – നിരൂപക പ്രശംസകള് നേടിയ സിനിമകള് നിര്മ്മിച്ചിട്ടുള്ള ഷെബിന് ബക്കറും ഒരുമിച്ചൊരുക്കുന്ന സിനിമയായതിനാല് തന്നെ സിനിമാപ്രേക്ഷകര് ഏറെ പ്രതീക്ഷയിലായിരുന്നു. ആ പ്രതീക്ഷയ്ക്കൊത്ത് ചിത്രം എത്തിയിട്ടുണ്ട് എന്നാണ് പ്രേക്ഷകരുടെ ഭാഷ്യം.
അഖില് അനില്കുമാറും അപ്പു അസ്ലമും ചേര്ന്നാണ് തിരക്കഥ. മനോഹരമായ ദൃശ്യങ്ങള് ഒരുക്കിയിരിക്കുന്നത് അനിരുദ്ധ് അനീഷും എഡിറ്റിംഗ് രാഹുല് രാധാകൃഷ്ണനും ഹൃദ്യമായ പാട്ടുകള് ഒരുക്കിയിട്ടുള്ളത് ഇലക്ട്രോണിക് കിളിയുമാണ്. തീര്ച്ചയായും കുടുംബങ്ങളുടേയും യൂത്തിന്റേയും പള്സറിഞ്ഞ് ഒരുക്കിയിരിക്കുന്നൊരു ഫീല്ഗുഡ് ചിത്രമാണ് തലവര എന്നുറപ്പിച്ച് പറയാം.
