ഓട്ടവ : എച്ച്-1ബി വീസ ഫീസ് യുഎസ് കുത്തനെ ഉയര്ത്തിയതിന് പിന്നാലെ, ഈ അവസരം ഉപയോഗപ്പെടുത്താന് പദ്ധതിയിട്ട് കാനഡ. ഇന്ത്യയില് നിന്നടക്കമുള്ള വിദേശികളായ സാങ്കേതിക വിദഗ്ധരെയും പ്രതിഭകളെയും കാനഡയിലേക്ക് ആകര്ഷിക്കാനാണ് നീക്കം. ഇതിനായി കുടിയേറ്റ നയം പുനഃപരിശോധിക്കുമെന്ന് കനേഡിയന് പ്രധാനമന്ത്രി മാര്ക്ക് കാര്ണി സൂചന നല്കി. മുന്പ് എച്ച്-1ബി വീസ ലഭിച്ചിരുന്നവരെ ആകര്ഷിക്കാനുള്ള അവസരമാണിതെന്ന് അദ്ദേഹം ലണ്ടനില് മാധ്യമപ്രവര്ത്തകരോട് പറഞ്ഞു. ഈ വലിയ ഫീസ് ഒഴിവാക്കുന്നതിനായി, ആമസോണ്, മൈക്രോസോഫ്റ്റ്, ആല്ഫബെറ്റ് പോലുള്ള ടെക് കമ്പനികള്ക്ക് കാനഡയിലെ ഓഫീസുകളില് നിയമനം വേഗത്തിലാക്കാന് കഴിഞ്ഞേക്കും.
കാനഡയെ കൂടാതെ, വൈദഗ്ധ്യമുള്ള ഇന്ത്യന് പ്രൊഫഷണലുകളെ ആകര്ഷിക്കാന് ജര്മ്മനിയും യുകെയും നടപടികള് ആരംഭിച്ചിട്ടുണ്ട്. ഇന്ത്യയിലെ ജര്മ്മന് അംബാസഡര് ഇന്ത്യന് പ്രതിഭകളെ പരസ്യമായി ക്ഷണിക്കുകയും, യുകെയില് മികച്ച വിദഗ്ധര്ക്കുള്ള വീസ തടസ്സങ്ങള് കുറയ്ക്കാന് ടാസ്ക് ഫോഴ്സ് രൂപീകരിക്കുകയും ചെയ്തിട്ടുണ്ട്. വലിയൊരു ഇന്ത്യന് പ്രവാസി സമൂഹം കാനഡയില് നിലവിലുണ്ട്. ഉയര്ന്ന ശമ്പളവും സ്ഥിരതാമസത്തിനുള്ള സാധ്യതകളും വാഗ്ദാനം ചെയ്യുന്ന കാനഡ, യുഎസിലേക്ക് ആകര്ഷിക്കപ്പെട്ടിരുന്ന വിദഗ്ധ തൊഴിലാളികള്ക്ക് ആകര്ഷകമായ ബദലായി ഉയര്ന്നുവരുന്നു എന്നാണ്വിലയിരുത്തല്.
