കുവൈത്ത് : കുവൈത്തിൽ ഒരു അറബ് രാജ്യത്ത് നിന്ന് എത്തിച്ച 20 അടി കണ്ടെയ്നറിൽ ഒളിപ്പിച്ചിട്ടുള്ള ഏകദേശം 20 ലക്ഷം കാപ്റ്റഗൺ ഗുളികകൾ കസ്റ്റംസിന്റെ രഹസ്യ അന്വേഷണം വഴി പിടികൂടി. ജനറൽ അഡ്മിനിസ്ട്രേഷൻ ഓഫ് കസ്റ്റംസിന്റെ ഓപ്പറേഷനിൽ, ഷുവൈഖ് തുറമുഖത്തിൽ എത്തിയ കണ്ടെയ്നറിലെ ഗ്ലാസ് പാനലുകളുടെ അരികുകളിലാണ് മയക്കുമരുന്ന് അതീവ രഹസ്യമായി ഒളിപ്പിച്ചിരുന്നത്. പിടിച്ചെടുത്ത മയക്കുമരുന്നിന്റെ ഭാരം ഏകദേശം 364 കിലോഗ്രാം, വിപണിയിൽ വില ഏകദേശം 55 ലക്ഷം കുവൈത്തി ദിനാർ ആണ്.
ജനറൽ ഡിപ്പാർട്ട്മെന്റ് ഓഫ് ക്രിമിനൽ ഇൻവെസ്റ്റിഗേഷനിൽ നിന്നുള്ള രഹസ്യ വിവരങ്ങളെ തുടർന്ന് കസ്റ്റംസും ആഭ്യന്തര മന്ത്രാലയവും ചേർന്ന് ഓപ്പറേഷൻ നടപ്പിലാക്കി. വിവരമെത്തിയ ഉടൻ, ഹവല്ലി ഗവർണറേറ്റ് ഇൻവെസ്റ്റിഗേഷൻ ഡിപ്പാർട്ട്മെൻറിലെ ഉദ്യോഗസ്ഥർ കസ്റ്റംസിനൊപ്പം കണ്ടെയ്നറിന്റെ നീക്കങ്ങൾ നിരീക്ഷിക്കുകയും, ട്രക്കിനുള്ളിൽ രഹസ്യാന്വേഷണ ഉദ്യോഗസ്ഥരെ വിന്യസിക്കുകയും ചെയ്തു. തുടർന്ന് വാഹനത്തെ അംഘാര പ്രദേശത്ത് തടഞ്ഞ് പ്രധാന പ്രതി ഉൾപ്പെടെ അഞ്ചു പേരെ അറസ്റ്റ് ചെയ്തു.
