തിരുവനന്തപുരം: കാഞ്ഞിരംകുളം ചാവടി ജംഗ്ഷന് സമീപം നടന്ന ബൈക്ക് കൂട്ടിയിടിപ്പിൽ യുവാവിന് ദാരുണാന്ത്യം . അതിയന്നൂർ മരുതംകോട് സ്വദേശി ആദർശ് ആണ് മരിച്ചത്. തലയ്ക്കും മുഖത്തും ഗുരുതര പരിക്കേറ്റ ആദർശിനെ നെയ്യാറ്റിൻകര സ്വകാര്യ ആശുപത്രിയിൽ പ്രവേശിപ്പിച്ചെങ്കിലും രാത്രി മരണപ്പെടുകയായിരുന്നു.

അപകടത്തിൽ പരുക്കേറ്റവരിൽ അവണാകുഴി സ്വദേശി മനു, ബാലരാമപുരം സ്വദേശി മനു, ചാവടി സ്വദേശികളായ വിശാഖ്, അപ്പു, അരുൺ എന്നിവരെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. അമിത വേഗമാണ് അപകട കാരണമെന്ന് സമീപവാസികൾ പറയുന്നു. സംഭവത്തിൽ ബൈക്ക് രണ്ടു ഗ്രൂപ്പുകളിലായി – കാഞ്ഞിരംകുളം മുതൽ പുല്ലുവിളയിലേക്ക് വരുന്ന മൂന്ന് പേർ, പുല്ലുവിളയിൽ നിന്ന് ചാവടിയിലേക്ക് പോകുന്ന മൂന്ന് പേർ – തമ്മിൽ കൂട്ടിയിടിക്കുകയായിരുന്നു.

കാഞ്ഞിരംകുളം പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. ആദർശിന്‍റെ മൃതദേഹം പോസ്റ്റ്മോർട്ടം പൂര്‍ത്തിയാക്കിയ ശേഷം നെയ്യാറ്റിൻകര ജനറൽ ആശുപത്രി മോർച്ചറിയിൽ സൂക്ഷിച്ചിരിക്കുന്നു. വിദേശത്തുള്ള അമ്മ നാട്ടിലെത്തിയ ശേഷം നാളെ രാവിലെ 11 മണിക്ക് സംസ്കാരം നടത്തുമെന്ന് ബന്ധുക്കൾ അറിയിച്ചു.