തിരുവനന്തപുരം: കേരള ടൂറിസം വകുപ്പ് വനിതാ സംരംഭകർക്കായി സാമ്പത്തിക സഹായം നൽകുന്നതിനായി അപേക്ഷ ക്ഷണിച്ചു. ടൂറിസം വകുപ്പിന്റെ കേരള ഉത്തരവാദിത്ത ടൂറിസം (ആർ.ടി) മിഷൻ സൊസൈറ്റിയിൽ രജിസ്റ്റർ ചെയ്ത വനിതാ യൂണിറ്റുകൾക്ക് ഒറ്റത്തവണ ധനസഹായം ലഭ്യമാകും. സഹായം ഫ്രഷ് അപ്പ് ഹോംസ്, വനിതാ ആർ.ടി ക്ലബ് തുടങ്ങിയ സംരംഭങ്ങൾക്കും, വനിതാ സംരംഭകത്വ വികസന പദ്ധതികൾക്കും നൽകും.
സംസ്ഥാനത്ത് പ്രവർത്തിക്കുന്ന ഹോംസ്റ്റേകൾ, എക്സ്പീരിയൻസ് എത്നിക് ക്യുസിൻ യൂണിറ്റുകൾ, ഗ്രാമീണ സന്ദർശന പാക്കേജുകൾ, ഫാം സ്റ്റേ തുടങ്ങിയ പദ്ധതികളും ഈ പദ്ധതിയിൽ ഉൾപ്പെടുന്നു. ഫ്രഷ് അപ്പ് ഹോംസ് പദ്ധതിയിലേക്ക് ഏകദേശം 50 യൂണിറ്റുകൾക്ക് ₹25,000 വീതം രണ്ട് ഘട്ടത്തിൽ ധനസഹായം ലഭിക്കും.
മുൻഗണനാ പ്രദേശങ്ങളിൽ കാന്തല്ലൂർ, മറയൂർ, വട്ടവട, മറവുന്തുരത്ത്, ചെമ്പ്, കൂടരഞ്ഞി, കടലുണ്ടി, തൃത്താല, പട്ടിത്തറ, പിണറായി, അഞ്ചരക്കണ്ടി, ചേകാടി, പെരുമ്പളം, വലിയപറമ്പ്, അയ്മനം, മണ്റോ തുരുത്ത്, ആറന്മുള എന്നിവിടങ്ങളിൽ രണ്ട് യൂണിറ്റുകൾക്കും, കണ്ണൂർ ചാൽ ബീച്ച്, മുഹമ്മ, തലയാഴം, വെച്ചൂർ, പുന്നയൂർകുളം, അഞ്ചുതെങ്ങ്, അമ്പൂരി, ബാലരാമപുരം, ആദികടലായി, തണ്ണീർമുക്കം, തിരുവില്വാമല, തിരുനെല്ലി എന്നിവിടങ്ങളിൽ ഒരു യൂണിറ്റിനും സഹായം ലഭിക്കും. വനിതാ സംരംഭകർ തങ്ങളുടെ അപേക്ഷകൾ സമയബന്ധിതമായി സമർപ്പിക്കണമെന്ന് അധികൃതർ അറിയിച്ചു.
