തിരുവനന്തപുരം: രാഹുൽ മാങ്കൂട്ടത്തിൽ വിഷയത്തിൽ എഐസിസിയ്ക്കും പ്രിയങ്ക ഗാന്ധിയ്ക്കും പരാതി നൽകി യൂത്ത് കോൺഗ്രസ് സംസ്ഥാന ജനറൽ സെക്രട്ടറി സജന ബി സജൻ. വനിതാ നേതാക്കളടങ്ങുന്ന അന്വേഷണ കമ്മീഷനെ നിയമിച്ച്, ഇരകളായതായി പറയുന്ന യുവതികളെ നേരിൽ കണ്ടു വിഷയത്തെ ഗൗരവത്തോടെ പരിശോധിക്കണമെന്നാണ് സജനയുടെ ആവശ്യം. സ്ത്രീപക്ഷ നിലപാടുകളിൽ കോൺഗ്രസ് ഇരട്ടത്താപ്പ് കാണിക്കുന്നുവെന്ന സംശയം ജനങ്ങളിൽ നിന്നും നീക്കം ചെയ്യേണ്ടതുണ്ടെന്നും അവർ വ്യക്തമാക്കി.
നേരത്തെയും രാഹുൽ മാങ്കൂട്ടത്തിലിനെതിരെ എഐസിസിക്ക് പരാതി ലഭിച്ചിരുന്നു. കഴിഞ്ഞ ദിവസം രാഹുൽ മാങ്കൂട്ടത്തിലിനെ പ്രാഥമിക അംഗത്വത്തിൽ നിന്ന് പുറത്താക്കണമെന്ന് ആവശ്യപ്പെട്ട് സജ്ന ഫേസ്ബുക്കിൽ കുറിപ്പ് പങ്കുവെച്ചിരുന്നു. മുൻ കെപിസിസി പ്രസിഡന്റ് കെ സുധാകരൻ രാഹുലിനെ പരസ്യമായി പിന്തുണച്ച് രംഗത്തെത്തിയതിനിടെയാണ് യൂത്ത് കോണ്ഗ്രസ് വനിതാ നേതാവ് തന്നെ പാര്ട്ടിക്ക് പരാതി നൽകിയിരിക്കുന്നത്.
