മലപ്പുറം: കൊണ്ടോട്ടി ബുഖാരി ദഅ്വ കോളേജ് വിദ്യാർത്ഥി യൂണിയൻ ‘സാബിക്’ സംഘടിപ്പിച്ച കൺസോളിയം ആർട്സ് ഫെസ്റ്റിവൽ ’25-ന് ബുഖാരി കാമ്പസിൽ പ്രൗഢമായ പരിസമാപ്തി. ‘എവർലാസ്റ്റിംഗ് ലിറ്റിൽസ്’ (Everlasting Littles) എന്ന വേറിട്ട പ്രമേയത്തിൽ ഡിസംബർ 4 മുതൽ 7 വരെ നടന്ന മേള, കലയുടെയും ചിന്തയുടെയും പുതിയ അനുഭവമാണ് വിദ്യാർത്ഥികൾക്ക് സമ്മാനിച്ചത്. പ്രപഞ്ചത്തിലെ ഓരോ അണുവിലും, നാം ചെയ്യുന്ന ചെറിയ നന്മകളിലും വലിയ മാറ്റങ്ങൾ സൃഷ്ടിക്കാനുള്ള ശക്തിയുണ്ടെന്ന സന്ദേശമാണ് കൺസോളിയം ഇത്തവണത്തെ ഫെസ്റ്റിവലിലൂടെ നൽകിയത്.
വൈജ്ഞാനിക സംവാദങ്ങളുടെ വേദികൾ കൂടിയായിരുന്നു.ലഘുവായ കലാപ്രകടനങ്ങൾക്കപ്പുറം ഗൗരവമേറിയ ചർച്ചകൾക്കും കൺസോളിയം വേദിയായി. ‘സുപീരിയർ കൾച്ചറൽ ടോക്ക്’ മത്സരത്തിൽ കരിയറിസം, വർത്തമാന ഇസ്ലാമിന്റെ മൂലധനം, മലയാളത്തിന്റെ ഖുർആൻ വായനാനുഭവം, ബഹുസ്വര ഇസ്ലാമിന്റെ പ്രതിനിധാനങ്ങൾ തുടങ്ങിയ വിഷയങ്ങളിൽ വിദ്യാർത്ഥികൾ ആഴത്തിലുള്ള പഠനങ്ങൾ അവതരിപ്പിച്ചു. ശ്രദ്ധേയമായ ‘ഉറുദു കോൺഫറൻസിൽ’ ആർട്ടിഫിഷ്യൽ ഇന്റലിജൻസ് (AI), സത്യാനന്തര കാലത്തെ ഡീപ് ഫേക്ക് (Deep Fake) വെല്ലുവിളികൾ, സുസ്ഥിര വികസനം, പലായനം (Migration) തുടങ്ങിയ സമകാലിക ആഗോള വിഷയങ്ങൾ ചർച്ച ചെയ്യപ്പെട്ടു.
ഒമ്പത് കാമ്പസുകളിൽ നിന്നായി അറുനൂറിലധികം പ്രതിഭകളാണ് മേളയിൽ മാറ്റുരച്ചത്. സ്പിരിച്വൽ പ്രൊഫിഷൻസി, കോഗ്നിഷൻ, ടെക്നിക്കൽ, പ്രസന്റേഷൻ, റൈറ്റിംഗ്, ഇല്ലസ്ട്രേഷൻ, മെലഡി, റിറ്റെൻഷൻ എന്നീ എട്ട് സ്കില്ലുകളിലായി 300-ഓളം മത്സരങ്ങൾ നടന്നു. ബയോ വിസ്ഡം, അഖില കേരള ദീൻ ഡിവൈസ് ഐഡിയത്തോൺ, സയൻസ് എക്സ്പോ, വെർച്വൽ നരേഷൻ, പോഡ്കാസ്റ്റ് തുടങ്ങിയ വൈവിധ്യമാർന്ന പരിപാടികളും ഫെസ്റ്റിവലിന്റെ ഭാഗമായി നടന്നു.
കൺസോളിയം ’25 ൽ കേരള സാഹിത്യ അക്കാദമി അവാർഡ് ജേതാവ് ഡോ. കെ.എം. അനിൽ ചേലേമ്പ്ര മുഖ്യാതിഥിയായി. December 07 ന് നടന്ന സമാപന സംഗമം ബുഖാരി സ്ഥാപനങ്ങളുടെ ജനറൽ സെക്രട്ടറി അബൂഹനീഫൽ ഫൈസി തെന്നലയുടെ അധ്യക്ഷതയിൽ SYS കേരള സ്റ്റേറ്റ് സെക്രട്ടറി സി കെ ശക്കീർ അരിമ്പ്ര ഉദ്ഘാടനം ചെയ്തു. കെ.പി മിഖ്ദാദ് ബാഖവി ചുങ്കത്തറ, ഖാലിദ് അഹ്സനി ഫറോക്ക്, അബ്ദുൽ ഹക്കീം ഹാജി, അബ്ദുൽ മലിക് അഹ്സനി മേൽമുറി, സംബന്ധിച്ചു.
