കോട്ടയം: സ്വയം തൊഴിൽ സംരംഭങ്ങളിലൂടെ വ്യക്തികളെ സ്വയംപര്യാപ്തരാക്കുക എന്ന ലക്ഷ്യത്തോടെ കോട്ടയം അതിരൂപതയുടെ സാമൂഹ്യ സേവന വിഭാഗമായ കോട്ടയം സോഷ്യൽ സർവ്വീസ് സൊസൈറ്റി (കെ.എസ്.എസ്.എസ്) ഹൈടെക് കോഴിവളർത്തൽ യൂണിറ്റുകൾ വിതരണം ചെയ്തു. തെള്ളകം ചൈതന്യയിൽ നടന്ന ചടങ്ങിൽ കെ.എസ്.എസ്.എസ് ഡയറക്ടർ ഫാ. സുനിൽ പെരുമാനൂർ പദ്ധതിയുടെ വിതരണോദ്ഘാടനം നിർവ്വഹിച്ചു.

പദ്ധതിയുടെ ഭാഗമായി തിരഞ്ഞെടുക്കപ്പെട്ട ഗുണഭോക്താക്കൾക്ക് ശാസ്ത്രീയമായി രൂപകൽപ്പന ചെയ്ത ഹൈടെക് കോഴിക്കൂടുകളും ബിവി 380 ഇനത്തിൽപ്പെട്ട മുട്ടക്കോഴികളുമാണ് നൽകിയത്. കൂടാതെ, കോഴികൾക്കുള്ള തീറ്റയും ആവശ്യമായ മരുന്നുകളും പദ്ധതിയുടെ ഭാഗമായി ലഭ്യമാക്കിയിട്ടുണ്ട്. സാധാരണക്കാർക്ക് വീട്ടുമുറ്റത്ത് തന്നെ ആദായകരമായ രീതിയിൽ കോഴിവളർത്തൽ നടത്തുന്നതിനും അതിലൂടെ സുസ്ഥിരമായ ഒരു വരുമാനം ഉറപ്പാക്കുന്നതിനും വേണ്ടിയാണ് കെ.എസ്.എസ്.എസ് ഈ വിപുലമായ പദ്ധതിക്ക് രൂപം നൽകിയിരിക്കുന്നത്.