കോട്ടയം : തലയോലപ്പറമ്പിൽ മൂവാറ്റുപുഴയാറിന്റെ തീരത്ത് കണ്ടൽച്ചെടികൾ നട്ട് വിദ്യാർഥികൾ. മറവൻതുരുത്ത് ഗവ. യുപി സ്കൂളിലെ വിദ്യാർഥികളാണ് മുവാറ്റുപുഴയാറിന്റെ തീരപ്രദേശമായ ചുങ്കം ഭാഗത്ത് കണ്ടൽച്ചെടികൾ നട്ടത്. പഞ്ചായത്തംഗം ബിന്ദു സുനിൽ ഉദ്ഘാടനംചെയ്തു.
കണ്ടൽച്ചെടികളുടെ പ്രാധാന്യം നേരിട്ടു മനസ്സിലാക്കാൻ സീഡ് ക്ലബ് അംഗങ്ങൾ ഒക്ടോബറിൽ കണ്ടൽവനങ്ങളിലേക്ക് പഠനയാത്ര നടത്തിയിരുന്നു. സീഡ് കോഡിനേറ്റർമാരുടെ നേതൃത്വത്തിൽ നടത്തിയ പഠനയാത്രയുടെ തുടർച്ചയായാണ് പുഴത്തീരത്ത് കുട്ടികൾ കണ്ടൽച്ചെടികൾ നട്ടത്.
ചടങ്ങിൽ പിടിഎ പ്രസിഡന്റ് അഡ്വ. പി.ആർ. പ്രമോദ്, വൈസ് പ്രസിഡന്റ് വി.പി. ജയകുമാർ, പ്രഥമാധ്യാപകൻ സി.പി. പ്രമോദ്, മാതൃഭൂമി സീഡ് കോഡിനേറ്റർമാരും അധ്യാപകരുമായ വി. ഐശ്വര്യ, അരുണിമാ ബലരാമൻ, ബോബി ജോസ്, എംപിടിഎ പ്രസിഡന്റ് സൗദാ നവാസ്, ചുങ്കം തനിമ ക്ലബ് സെക്രട്ടറി ബിനു മോഹൻ എന്നിവർ നേതൃത്വം നൽകി.
