തിരുവനന്തപുരം: പ്രധാനമന്ത്രി നരേന്ദ്രമോദി ഇന്ന് തിരുവനന്തപുരത്ത്. വിമാനത്താവളത്തില് നിന്ന് പുത്തരിക്കണ്ടത്തേക്ക് റോഡ് ഷോ നടക്കും. വിവിധ കേന്ദ്ര പദ്ധതികളുടെ ഉദ്ഘാടനവും തിരുവനന്തപുരം നഗരത്തിന്റെ വികസന രേഖയും പ്രഖ്യാപിക്കും. അതിവേഗ റെയില് പാതയും പ്രധാനമന്ത്രി പ്രഖ്യാപിക്കാന് സാധ്യത.
പ്രധാനമന്ത്രി നരേന്ദ്രമോദി ഇന്ന് തലസ്ഥാനത്ത് എത്തുമ്പോള് വിവിധ പദ്ധതികള് നാടിന് സമര്പ്പിക്കുമെന്നാണ് പ്രതീക്ഷ പുത്തരിക്കണ്ടം മൈതാനത്ത് നടക്കുന്ന പരിപാടിയില് വിവിധ കേന്ദ്ര പദ്ധതികളുടെ ഉദ്ഘാടനവും തിരുവനന്തപുരം നഗരത്തിന്റെ വികസന രേഖയും പ്രഖ്യാപിക്കും.
ഔദ്യോഗിക വേദിയില് അമൃത് ഭാരത് ട്രെയിനുകളുടെ ഫ്ലാഗ് ഓഫും ഇന്നവേഷന് ടെക്നോളജി ആന്ഡ് ഓന്ട്രണര്ഷിപ്പ് ഹബ്ബിന്റെ തറക്കല്ലിടിലും പ്രധാനമന്ത്രി നിര്വഹിക്കും. കേരളത്തിനുള്ള അതിവേഗ റെയില് പാതയും പ്രധാനമന്ത്രി പ്രഖ്യാപിക്കാന് സാധ്യതയുണ്ട്. സില്വര്ലൈനിന് ബദലായുള്ള ഇ ശ്രീധരന്റെ പദ്ധതിയാണ് പ്രഖ്യാപിക്കുന്നതെന്നാണ് സൂചന. ഡിപിആര് തയ്യാറാക്കുന്ന ഡിഎംആര്സിക്ക് തന്നെയായിരിക്കും നിര്മ്മാണച്ചുമതല.
ഔദ്യോഗിക ചടങ്ങിന് ശേഷം കോര്പ്പറേഷന്റെ വികസന ബ്ലൂ പ്രിന്റ് പ്രകാശനത്തിനായി സമീപത്തെ പാര്ട്ടി വേദിയില് പ്രധാനമന്ത്രി എത്തും. 25,000ത്തിലധികം പ്രവര്ത്തകരെ പങ്കെടുപ്പിച്ചുള്ള പൊതുസമ്മേളനമാണ് ബിജെപി സംഘടിപ്പിക്കുന്നത്. കോര്പ്പറേഷനില് അധികാരത്തിലേറിയാല് 45 ദിവസത്തിനകം പ്രധാനമന്ത്രിയെ തലസ്ഥാനത്ത് കൊണ്ടുവരുമെന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര് പ്രഖ്യാപിച്ചിരുന്നു.
