തിരുവനന്തപുരം: നാമനിർദ്ദേശ പത്രിക സമർപ്പിക്കാനുള്ള അവസാന ദിവസം ഇന്ന്. പല സ്ഥാനാർഥികളും കഴിഞ്ഞ ദിവസങ്ങളിൽ തന്നെ പത്രിക സമർപ്പിച്ചിരിക്കുമ്പോൾ ബാക്കിയുള്ളവർ ഇന്ന് ബന്ധപ്പെട്ട വരണാധികാരികൾക്ക് മുമ്പാകെ പത്രിക നൽകും. പുനലൂരിൽ യുഡിഎഫിലെ തർക്കം പരിഹരിച്ചതോടെ സ്ഥാനാർഥി നൗഷാദ് യൂനുസ് ഇന്ന് പുനലൂർ ആർടിഒ ഓഫീസിൽ എത്തി നാമനിർദ്ദേശ പത്രിക സമർപ്പിക്കും.
കരുനാഗപ്പള്ളിയിൽ എൻഡിഎ സ്ഥാനാർഥി ജിതിൻ ദേവിന്റെ പത്രിക സമർപ്പണ ചടങ്ങിൽ പങ്കെടുക്കാൻ മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസ് എത്തും. തുടർന്ന് സ്ഥാനാർഥിയുടെ റോഡ് ഷോയിലും അദ്ദേഹം പങ്കെടുക്കും. ഇതിനുപുറമെ കൊട്ടാരക്കരയിലെ എൻഡിഎ സ്ഥാനാർഥി ആർ രശ്മി, ഇരവിപുരത്തെ യുഡിഎഫ് സ്ഥാനാർഥി വിഷ്ണു മോഹൻ, എൽഡിഎഫ് സ്ഥാനാർഥി എം നൗഷാദ്, കൊല്ലത്തെ എൽഡിഎഫ് സ്ഥാനാർഥി എസ് ജയമോഹൻ, ചടയമംഗലത്തെ യുഡിഎഫ് സ്ഥാനാർഥി എം എം നസീർ, കുണ്ടറയിലെ എൻഡിഎ സ്ഥാനാർഥി റോബിൻ രാധാകൃഷ്ണൻ, എൽഡിഎഫ് സ്ഥാനാർഥി എസ് എൽ സജികുമാർ എന്നിവരും ഇന്ന് നാമനിർദ്ദേശ പത്രിക സമർപ്പിക്കും.
