മലപ്പുറം: കേരളത്തില് 85ലധികം സീറ്റുകള് നേടി യുഡിഎഫ് അധികാരത്തില് വരുമെന്ന് മുസ്ലിം ലീഗിന്റെ വിലയിരുത്തല്. ലീഗ് മത്സരിച്ച 27 മണ്ഡലങ്ങളില് 21 മുതല് 24 വരെ സീറ്റുകളില് വിജയിക്കും. യുഡിഎഫ് തരംഗമുണ്ടായാല് മുഴുവന് സീറ്റുകളിലും വിജയിക്കുമെന്നും ലീഗ് നടത്തിയ സര്വേയുടെയും ഇന്നലെ ചേര്ന്ന നേതൃയോഗത്തിനും ശേഷം വിലയിരുത്തി.
പാണക്കാട് കുടുംബാംഗങ്ങള് നേരിട്ട് പ്രചാരണം നയിച്ചത് ഗുണം ചെയ്തു. സംസ്ഥാന സര്ക്കാരിനെതിരെ ന്യൂനപക്ഷ ഏകീകരണം ഉണ്ടായി. താഴേതട്ടില് ഭരണവിരുദ്ധ വികാരം അലയടിച്ചു. മലപ്പുറത്ത് ലീഗ് മത്സരിച്ച 12 സീറ്റിലും വിജയിക്കും. ഐക്യത്തോടെ കോണ്ഗ്രസ് പ്രവര്ത്തിച്ചത് നേട്ടമുണ്ടാക്കിയെന്നും ലീഗ് വിലയിരുത്തി. അതേസമയം, നൂറ് സീറ്റ് നേടി യുഡിഎഫ് അധികാരത്തില് വരുമെന്നാണ് വിഡി സതീശനടക്കമുള്ള കോണ്ഗ്രസ് നേതാക്കളുടെ പ്രതികരണം.
