രാത്രി ഷിഫ്റ്റിൽ ജോലി ചെയ്യുന്നവർക്ക് പ്രമേഹം, മോശം കൊളസ്ട്രോൾ, വിറ്റാമിൻ ഡി കുറവ് എന്നിവയ്ക്ക് കൂടുതൽ സാധ്യതയുണ്ടെന്ന് പഠനം വ്യക്തമാക്കുന്നു. ഉറക്കചക്രം താളം തെറ്റുന്നതിലൂടെ ആരോഗ്യത്തെ ഗൗരവമായി ബാധിക്കുകയും ദീർഘകാല രോഗങ്ങളുടെ സാധ്യത ഉയർത്തുകയും ചെയ്യുന്നതായി കണ്ടെത്തൽ.
ഉറക്കക്കുറവ് രാത്രി ഷിഫ്റ്റ് തൊഴിലാളികൾ നേരിടുന്ന പ്രധാന പ്രശ്നങ്ങളിലൊന്നാണ്.ഇന്ത്യൻ ജേണൽ ഓഫ് എൻഡോക്രൈനോളജി ആൻഡ് മെറ്റബോളിസത്തിൽ പ്രസിദ്ധീകരിച്ച പഠനമനുസരിച്ച്, യുവാക്കളിലും ആരോഗ്യവാന്മാരിലും പോലും രാത്രി ഷിഫ്റ്റ് ജോലി ശരീരത്തിന്റെ മെറ്റബോളിസത്തെയും ഹോർമോൺ നിലയെയും കാര്യമായി ബാധിക്കുന്നു.
പഠനത്തിൽ രാത്രി ഷിഫ്റ്റ് തൊഴിലാളികൾക്ക് ഇൻസുലിൻ പ്രതിരോധം കൂടുതലാണെന്ന് കണ്ടെത്തി. ഇത് ടൈപ്പ് 2 പ്രമേഹ സാധ്യത ഉയർത്തുന്നു. രാത്രി ഷിഫ്റ്റിൽ ജോലി ചെയ്യുന്നവരിൽ 77% പേർക്ക് ഇൻസുലിൻ പ്രതിരോധ ലക്ഷണങ്ങൾ കണ്ടപ്പോൾ, പകൽ ഷിഫ്റ്റ് തൊഴിലാളികളിൽ ഇത് 62% മാത്രമാണ്.
ഇതോടൊപ്പം, ട്രൈഗ്ലിസറൈഡ് നില ഉയരുകയും എച്ച്ഡിഎൽ (നല്ല കൊളസ്ട്രോൾ) കുറയുകയും ചെയ്യുന്നത് ഹൃദ്രോഗ സാധ്യത വർദ്ധിപ്പിക്കുന്നു. പുരുഷന്മാരിൽ ടെസ്റ്റോസ്റ്റിറോൺ, ല്യൂട്ടിനൈസിംഗ് ഹോർമോൺ എന്നിവയുടെ അളവ് കുറയുന്നതും കണ്ടെത്തിയിട്ടുണ്ട്, ഇത് പ്രത്യുത്പാദനാരോഗ്യത്തെ ബാധിക്കാമെന്ന് ഗവേഷകർ മുന്നറിയിപ്പ് നൽകുന്നു.
കൂടാതെ, സൂര്യപ്രകാശം കുറവായി ലഭിക്കുന്നതിനാൽ രാത്രി ഷിഫ്റ്റ് തൊഴിലാളികൾക്ക് വിറ്റാമിൻ ഡി കുറവ് ഉണ്ടാകാനുള്ള സാധ്യതയും കൂടുതലാണ്. വീടിനുള്ളിൽ കൂടുതൽ സമയം ചെലവഴിക്കുകയോ പകൽ സമയത്ത് ഉറങ്ങുകയോ ചെയ്യുന്നതാണ് ഇതിന് പ്രധാന കാരണം.
